VOV4.Xơ Đăng - Tiô rơkong krếo thế dêi pôa Lê Văn Thành, Ngế pro xiâm phŏ hnê ngăn tơnêi têa, pôa Frans Timmermans, Kăn xiâm phŏ hnê ngăn Viƀan châu Âu hiăng ai roh lăm pôu pêi cheăng a Việt Nam sap hâi lơ 17 troh hâi lơ 19/2/2022. Kơxo hâi lơ 18/2, a roh hôp tơpui tơno pơla pôa Lê Văn Thành ƀă pôa Frans Timmermans, péa pâ tối phiu ro hlo tung pơla kố nah, mơhé tơdjâk dêi pơreăng kân COVID-19, tơrŭm cheăng pơla Việt Nam – Khu tơrŭm châu Âu EU pơtối mơnhông mơdêk châ tơƀrê.

Tâi tâng roh hôp tơpui tơno

EU nôkố cho khu tơrŭm cheăng kâ – mơnhông mơdêk ki kal dêi Việt Nam, ki rơhêng vâ tối dế cho khu tŏng kum liăn ôh tá êa tơvêh kân má môi, kơchơ tê mơdró tê tơmeăm ngi kong têa ê kân má 3, kơchơ tê mơdró rôe tơmeăm ing kong têa ê kân má 5  ƀă khu mơ’no liăn cheăng kân má 6 dêi Việt Nam. Kơxô̆ liăn tê mơdró péa pâ Việt Nam – EU hiăng châ tơƀrê hên, châ 57 rơtal dollars klêi kơ’nâi 18 khế pêi pro tơdroăng tơkêa bro tê mơdró tơ’lêi hlâu EVFTA.

Péa pâ môi tuăn pơtối thăm pêi pro păng ‘nâng, châ tơƀrê tơrŭm cheăng tung mâu kơvâ kal kí – tơpui kâ, tê mơdró mơ’no liăn cheăng, tơrŭm mơnhông mơdêk, pêi chiâk deăng, kong prâi, on tơhrik, gak kring – cheăng lêng.

A Sa Ly tơplôu ƀă tơbleăng