Roh lăm pôu djâ ki kơnâ ƀă um mơhno ki kal ƀă tơrŭm cheăng péa tơnêi têa, ing mê pơtối rak troăng mơnhông châ tơƀrê hên, troh lâp lu ó rơdêi mâu khu râ, mâu kơvâ, mâu râ kuăn pơlê, mơjiâng tơdroăng tơrŭm cheăng, châ tơƀrê, păng ‘nâng. Kơxê mê, pôa Tô Lâm, Kăn xiâm pơkuâ hnê ngăn Đảng hiăng pơkuâ Leh tơdah.

Klêi leh tơdah, pôa Tô Lâm, Kăn xiâm pơkuâ hnê ngăn Đảng tơpui tơno ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ. Péa pâ ai hên tơdroăng pêi cheăng ki kal ƀă kĭ hên mơ-éa tơrŭm a hên kơvâ cheăng djâ tơrŭm cheăng mot trâu hơngế, châ tơƀrê hên ƀă tíu ki eăng bâ nếo.