A tôh kơphô̆ 6, bêng Tân Lợi, pơlê kong kơdrâm Ƀuôn Ma Thuột, tíu ki ai lối 1 rơpâu rơpŏng kuăn pơlê, tơdroăng cheăng hnê tối, xo rơkong tơpui tối châ tơbleăng pêi tro ‘ló, tơdâng tơ’mô ƀă châ xo tơdroăng ki pêi pro kơhnâ sap ing kuăn pơlê. Pôa Nguyễn Ngọc Thịnh, Tôh trưởng tôh ki xo rơkong tơpui tối dêi kuăn pơlê ăm ‘nâi:

“Ngin tơbleăng hnê tối tung mâu tơdroăng tơbleăng ‘na tơdroăng kal, tơdrêng amê hlối tối tơbleăng tíu ki tơkŭm hôp a hngêi hôp tôh kơphô̆. Troh nôkố, kuăn pơlê phiu ro khât, hlối môi tuăn khât ƀă troăng pơkâ dêi Đảng ƀă Tơnêi têa tung tơdroăng ‘mot tơkŭm, pro iâ kơ koan cheăng tơnêi têa, ƀă rơhêng vâ tơdroăng cheăng kăch măng kố gá kô ƀlêi chiâng”.

A mâu pơlê cheăm, kuăn pơlê hdroâng kuăn ngo xuân mơhno tơdroăng ki kal vâ ‘nâi plĕng troh troăng pơkâ kố. Pôa Y Rul Niê, a ƀuôn Pôč A, tơring Čư̆ Mgar ăm ‘nâi, vâi krâ kuăn pơlê xuân hlo mâu tơdroăng ki xơpá apoăng klêi ‘mot tơkŭm, la xuân loi khât kong pơlê pin kô lĕm tro tâ.

“Cheăm kố ƀă cheăm ki tá mê tâng vâ tối gá hơngế, ‘mot tơkŭm môi mê ƀăng tơnêi kân rơdân, vâi krâ prôk lăm ƀă kăn ƀô̆ lăm pêi cheăng xuân xơpá. La hiăng mơ-eăm mê athế ‘mêng rơnêu, kăn ƀô̆ athế ai ivá pêi cheăng rơkê tâ hdrối. Mê hdrối gá xơpá la tâng pêi rơkê mê gá kô ƀlêi chiâng”.

Ƀă hên kuăn pơlê, tơdroăng ki loi ƀă tơngah mơnhông ôh ti xê pơkâ to a râ kong pơlê, râ cheăm, mê loi tá mâu tơdroăng tơngah mơnhông cheăng kâ rêh ối pơlê pơla pơla péa kơpong. Ngoh Huỳnh Trần Minh Đức, a pơlê kong kơdrâm Ƀuôn Ma Thuột tối:

"Tâng Dak Lak ‘mot tơkŭm tơdjuôm ƀă Phú Yên mê kô pro tơkŭm kơpong rơdêi. Cheăng kâ têa kơxĭ tơkŭm ƀă pêi chiâk deăng dêi Tây Nguyên kô pro ivá mơnhông krá tơniăn. Troăng prôk, logistics kô tơ’lêi hlâu tâ hên”.

Ƀă pôa Nguyễn Ngọc Hiên, kuăn pơlê a bêng Tân Lợi, hmâ rêh ối a 2 to pơlê, Dak Lak ƀă Phú Yên, tối.

“Á pơlê xiâm cho a Phú Yên, rêh ối a Dak Lak sap ing tơxĭn. Nôkố tâng péa to kong pơlê ‘mot tơkŭm mê á phiu ro khât. Dak Lak ai ngo, ai kong, ai têa kơxĭ – tơkŭm ƀă dêi rơpó kô rơdêi, ăm tơnêi têa pin rế hía rế mơnhông tơniăn lĕm tâ”.

Pakĭng tơdroăng ki môi tuăn troăng pơkâ kân ‘na ‘mot tơkŭm, xing xoăng tíu pêi cheăng, kuăn pơlê Dak Lak xuân veăng tơpui tối ‘na mâu tơdroăng ki kal má môi ƀă hnoăng cheăng dêi mâu kăn ƀô̆ tung tíu pêi cheăng kơ koan tơnêi têa khu kăn pơkuâ 2 râ la ngiâ. Pôa Hồ Hồng, cheăm Quảng Tiến, tơring Čư̆ Mgar, tối tơdrăng:

“Á ối tôu tuăn, nôkố ‘mot tơkŭm gá kơdrâm môi tiah mê mê hôm chiâng vêh môi tiah hneăng hdrối nah há. Mê á rơhêng vâ tiah kố tâng ‘mot tơkŭm tíu pêi cheăng mê pêi cheăng athế rơkê, pơhlêh tơdroăng cheăng, pêi pro ăm gá rĕng, xêt, tơƀrê”.

Jâ Nguyễn Thị Xuân, a pơlê kong kơdrâm Ƀuôn Ma Thuột, xuân tối tiah kố ‘mot tơkŭm tíu pêi cheăng gá tro la tơdroăng ki ƀlêi chiâng kô tơkôm ngăn tung tơdroăng pêi cheăng rơkê dêi mâu kăn ƀô̆.

“Á hlo troăng pơkâ ‘mot tơkŭm tíu pêi cheăng gá tro. Ki hên kuăn pơlê bô bố xuân vâ môi tuăn. Púi vâ Tơnêi têa rah xo kăn ƀô̆ pêi cheăng ki ai tuăn ngoâ rơkê, pêi cheăng tơƀrê vâ kuăn pơlê rế hía rế phâi hơtôu, hơniâp ro”.

Xing xoăng, ‘mot tơkŭm tíu pêi cheăng kơ koan tơnêi têa cho hvêa prôk ki kal tung pơla pơhlêh nếo kơ koan cheăng tơnêi têa tiô troăng ki tơkŭm iâ, pêi cheăng xêt tơƀrê. Tơdroăng ki môi tuăn, loi ƀă tơngah dêi kuăn pơlê cho ivá mơ-eăm kân vâ rêm râ kăn pơkuâ tơbleăng ƀlêi chiâng troăng pơkâ kố, ăm tơnêi têa rế hía rế mơnhông tơniăn.