Mâu hâi ki kố, a kơpong kơphô̆ An Phú, bêng Tân Lợi, pơlê kong kơdrâm Buôn Ma Thuột, lối chât ngế tơkŭm troh tê rôe tơnêi, pro tơnêi chiâng tâk kơnâ yă nếo. 2 khế ahdrối, môi ƀăng tơnêi 100 met karê akố tê châ dâng 2 rơtal liăn, mê nôkố hiăng tâk troh a 2 rơtal liăn 5 rơpâu. Ôh ta xê to ƀăng tơnêi a kơphô̆ tâk kơnâ yă, mê tơnêi a hên bêng, cheăm ƀă kơpong achê pơlê kong kơdrâm Buôn Ma Thuột xuân hiăng tâk kơnâ châ dâng 20%,

Jâ Phạm Thị Thanh, ối a bêng Đạt Hiếu, pơlê kong krâm Buôn Hồ, kong pơlê Dak Lak tối ăm ngin ‘nâi: kuăn kơnốu ƀă mế jâ dế pêi cheăng a mâu kơ koan dêi kong pơlê Phú Yên. Tâng 2 kong pơlê tơmot chiâng môi, mê mâu vâi kuăn mơni kô lăm rêh ối a Buôn Ma Thuột pêi cheăng ƀă rêh ối. Xua tiah mê, jâ Thanh hiăng thâ rĕng tăng rôe tơnêi vâ pro hngêi ăm dêi vâi kuăn.

“Á hiăng tâng ai tơdroăng pơtâng tối kô tơ’mot 2 kong pơlê dêi pó, tơdroăng mê á hiăng tâng tối kơtăn kố châ 2 khế, mê á lăm troh a kơpong kơphô̆ Ân Phú hêng vâ rôe 100 met karê tơnêi, pơla mê nah vâi tê 2 rơtal liăn, á tơmiât nhên, ôh tá hâi vâ rôe. La nôkố hiăng tâng vâi pơtâng cho păng ‘nâng, Dak Lak prế Phú Yên kô mot chiâng môi kong pơlê mê á lăm êng nếo, drêng mê, vâi tối 100 met karê tơnêi mê yă 2 rơtal 600 rơtuh liăn. Yă tơnêi tâk kơnâ ó ‘nâng, la tuăn i hiâm dêi kăn ƀô̆ a Phú Yên rơhêng vâ châ tơniăn mê athế rôe tơnêi pro hngêi ăm mâu kuăn ‘nĕng. Á kô mơ-eăm rôe, tâng lôi ton ah, tơnêi kô pơtối tâk kơnâ ó tâ nếo”.

Pôa Phan Thái Bình, Kăn pơkuâ môi kŏng ti tê rôe tơnêi a Buôn Ma Thuột tối ăm ngin ‘nâi, kŏng ti ki kố ai 100 ngế cheăng tê mơdró, rôe mơdró tơnêi, tâng vâ riân rêm hâi kŏng ti kô bro 20 hô sơ tơdroăng tê rôe tơnêi. Tâng pơchông ngăn ƀă mơ’nui hơnăm 2022, mê roh kố tơdroăng tê rôe tơnêi châ tơniăn lĕm tro tâ.

“Tâng vâ tối tơdjuôm, tơdroăng tê rôe tơnêi a kong pơlê Dak Lak dế hiăng vâ pơhlêh hên tâ tâng vâ pơchông ngăn ƀă roh hdrối nah. Tơdroăng tăng rôe tơnêi pơtối tâk hên, môi pâ, xua tah lôi râ tơring, mâu kăn ƀô̆ châ pơtroh cheăng a cheăm, mâu ki ê châ pơtroh cheăng a Buôn Ma Thuột pêi cheăng. Pakĭng mê, hên ngế hơnăm hiăng hên, tro hơnăm pơtê cheăng xuân vâ lăm rêh ối a Buôn Ma Thuột xuân tâk hên. Pakĭng mê, klêi kơ’nâi pơtâng tối tơ’mot 2 kong pơlê chiâng môi, hdrối nah hiăng ai mơngế ing Dak Nông troh tăng rôe tơnêi, nôkố, ai tơnôm mơngế ing Phú Yên troh tăng rôe tơnêi. Vâi ki mê pơrá kal vâ rôe tơnêi mơjiâng pro hngêi ối khât”.

Tiô tơdroăng chêh tối, mơnhên ngăn dêi Ƀơrô pơkuâ ngăn ‘na tơnêi, cheăng tung Khu ngăn ‘na chiâk deăng ƀă Tơnêi tíu kong pơlê Dak Lak ăm ‘nâi, tung 3 khế apoăng hơnăm 2025, mâu khu ngăn cheăng tê rôe tơnêi hiăng chêh bro 75.000 hô sơ ai tơdjâk ‘na tê rôe tơnêi, tâk lối 17% pơchông ƀă rơnó kố dêi hơnăm nah.

Pôa Hoàng Xuân Phương, Kăn phŏ ngăn ‘na Ƀơrô pơkuâ ‘na tê rôe tơnêi mơnhên tối, kơxô̆ hô sơ tâk hên ó hiăng ai lối kơdrâm kơdrĕng mơngế lăm chêh pro hô sơ, pro tơdroăng chêh bro hlá mơ-éa a pơlê kong kơdrâm Buôn Ma Thuột ƀă tơring Cư̆ Mgar hâ hó, cheăng tơvâ tơvân:

“Ƀơrô chêh bro ‘na hô sơ tơnêi tíu hiăng pơkâ thế mâu khu râ cheăng pá kơdâm po tơ’nôm mâu tíu pêi cheăng vâ tơdah xo hô sơ ƀă pơtối pro mơdon tơ’nôm hâi ki tơdah xo hô sơ, hlá mơ-éa dêi kuăn pơlê, ôh tá khoh pro mơdon hlá mơ-éa dêi kuăn pơlê. Pakĭng mê, ing hâi lơ 1 khế 4, ngin hiăng pơkâ pêi pro túa pêi cheăng ki mơ’no tơdrêng tung um tơvi vâ tŏng gum, hnê tối, chêh bro klêi mâu hlá mơ-éa pơla kơ koan pro hnoăng mơhá ƀă ƀơrô kŏng chư̆ng, gum pêi pro klêi tơdroăng ki chêh bro tung online. Apăng nah, túa cheăng ki kố hiăng châ pêi tơƀrê, tơdroăng ki mơnhên hồ sơ hiăng hên luâ tâ hdrối nah ƀă hên ó ‘nâng”.

Tơdroăng tê rôe tơnêi thăm rế kơdrâm ó a Buôn Ma Thuột tung pơla mâu hâi hdrối mê hía nah, mê cho tơdroăng ki ga chiâng ai xêh ing hên tơdroăng, drêng ai tơdroăng ‘mot Phú Yên chiâng môi kong pơlê dêi Dak Lak, drêng tíu kố châ rah xo pro tíu xiâm pơkuâ ngăn kong pơlê Dak Lak. Rơtế ƀă hên mâu kăn ƀô̆, mơngế cheăng pơrá tơkŭm troh rêh ối a tíu xiâm, Buôn Ma Thuột, ƀă tơnêi tíu ki xiâm nếo, rế hiá rế mơnguân hên mâu rơpŏng hngêi, khu pơkuâ cheăng ƀă khu mơdró kâ.