Dak Lak xuân trâm ƀă tơdroăng mơngế krâ hên tâ mơngế ối nếo. Kố cho tơdroăng xiâm châ tối a roh tơpui tơno khoa hok dó inâi Tơdroăng ki ai khât troăng hơlâ pơ’leăng mâ mơngế tơdjâk troh vâi kơdrâi ƀă tối ‘na troăng pêi xua Khu xiâm Vâi kơdrâi Việt Nam tơkŭm po kơxo lơ 22/4 a Dak Lak.

A roh tơpui tơno, mâu kăn teăng mâ tơkŭm tơpui tơno, mơnhên ki tơdjâk dêi mâu troăng hơlâ pơ’leăng mâ mơngế tơdjâk troh vâi kơdrâi, hnoăng dêi vâi kơdrâi, droh rơtăm tung pêi pro troăng hơlâ pơ’leăng mâ mơngế. Mơnhên ki châ tơƀrê mâu troăng hơlâ nôkố dêi kong pơlê tung tơleăng mâu tơdroăng pơ’leăng mâ mơngế, ki rơhêng vâ tối cho tơdjâk troh vâi kơdrâi.

Ing mê pâ thế, pơkâ mâu troăng pêi ki tơdjâk troh rak kơlo ki tơtro, pơkuâ tơdroăng ki kơdrâi kơnốu drêng rơneh ƀă mơdêk ki dâi lĕm pơ’leăng mâ mơngế, rak ngăn ivá mơngế hơnăm hiăng krâ. Jâ Đàm Thị Vân Thoa, Kăn pơkuâ Troăng hơlâ – Luât, Khu xiâm Khu vâi kơdrâi Việt Nam tối ăm ‘nâi: mâu tơdroăng xiâm tối a roh tơpui tơno kô cho xiâm kối vâ pơtối kêi đeăng Đê tai khoa hok râ khu xiâm “Troăng hơlâ pơ’leăng mâ mơngế ƀă mơnhông – Tối ‘na troăng hơlâ ki tơdjâk troh vâi kơdrâi’’ xua Khu pơkuâ vâi kơdrâi Việt Nam pơkuâ.