Mâu kong pơlê Dak Nông, Lâm Đồng hiăng tối tơbleăng tơdroăng  xo mâu tơdroăng hnê tối dêi kuăn pơlê ‘na tơ’mot kong pơlê. Ing mê, tơdroăng pơkâ kơxô̆ 759 hâi lơ 14/4 dêi Ngế pro xiâm hnê ngăn Chin phuh, kong pơlê Lâm Đồng kô tơ’mot ƀă kong pơlê Dak Nông ƀă Bình Thuận, xo inâi kong pơlê Lâm Đồng; tíu pêi chăng xiâm kong pơlê pro a Đà Lạt.

Kong pơlê Lâm Đồng ki nếo klêi tơ’mot  kô ai tơnêi rơdâ 24.233km2 - cho kong pơlê ki ai tơnêi kân rơdâ má môi tung lâp tơnêi tea, pơ’leăng mâ mơngế 3.324.400 ngế. Hâi lơ 22/4, Khu xiâm ngăn cheăng pêi kong pơlê Lâm Đồng hiăng ai hlá mơ-éa chêh tơbleăng tơdroăng tơmâng xo hnê tối dêi kuăn pơlê mâu ngế teăng mâ rơpŏng hngêi ‘na tơdroăng pro rế lĕm tíu pêi cheăng râ kong pơlê ƀă pro rế lĕm râ cheăm.

Ing mê, mâu kăn hiăng tơkŭm xo tơdroăng hnê tối dêi lối 320.000 ngế kuăn pơlê tung kong pơlê. Ăm hlo, ai lối 97,8% ngế kuăn pơlê teăng mâ ăm rơpŏng vâ tơ’mot 3 kong pơlê Lâm Đồng, Bình Thuận, Dak Nông. Kơxô̆ kuăn pơlê vâ pro rế lĕm tíu pêi cheăng râ cheăm ai lối 97,3%.

-Tiô tơbleăng dêi kong pơlê Dak Nông, ai lối 97,2% kuăn pơlê tung kong pơlê môi tuăn vâ tiô troăng hơlâ tơmot chiâng môi kong pơlê Bình Thuận, Lâm Đồng. Hdrối mê, mâu tơring a kong pơlê Dak Nông hiăng pêi pro xing xoăng phĭu tơmâng rơkong kuăn pơlê tơpui a vâ chê 150.000 rơpŏng kuăn pơlê, pro tơ’lêi hlâu má môi ăm kuăn pơlê mơhno troăng tơmiêt dêi tơná.

Tơdroăng châ tơƀrê tâi tâng kuăn pơlê môi tuăn troăng hơlâ tơmot chiâng môi kong pơlê Dak Nông – Bình Thuận – Lâm Đồng. Kơxô̆ liăn pơlê môi tuăn tơmot chiâng môi râ cheăm cho lối 97%. Tiô tối hdrối kong pơlê Dak Nông kô rah xo bro lế lĕm tro kơdroh sap ing 71 kơ koan râ cheăm, chu u ối 28 cheăm.