Hâi tĭng vâi krâ nhŏng o pơlê Nueng, cheăm Biển Hồ, pơlê kong kơdrâm Pleiku tơkŭm a hngêi kuăn pơlê hmâ tơkŭm hôp vâ veăng hnê tối tơdroăng troăng hơlâ pro rế lĕm tíu pêi cheăng tơnêi têa. Kuăn pơlê troh amê vâ veăng  tơpui tối ƀă tơdroăng pro rế lĕm tíu pêi cheăng. Pôa Ksor Kroyh, 64 hơnăm, tối môi tuăn tiô troăng hơlâ po rơdâ cheăm Biển Hồ ing tơdroăng tơ’mot tơdjuôm mâu cheăm Nghĩa Hưng, cheăm Chư Đang Ya (tơring Chư Pah) ƀă cheăm Hà Bầu (tơring Đăk Đoa), hlối tah lôi râ pơlê kong kơdrâm ki ối tơdế rá cho pơlê kong kơdrâm Pleiku.

Tiô pôa, ki pơ’lêh mê kô gum kuăn pơlê tơ’lêi hlâu tơdroăng pro hlá mơ-éa rĕng tâ. La klêi tơ’mot, kơxô̆ kuăn ngo tung cheăm kô tâk tơdế, tâk  47% mê kal thế ai hên ngế pro kăn ƀô̆ veăng gum kuăn pơlê. Pôa Ksor Kroyh loi tiah kố:

“ Tro há, tah lối ki tơdế rá. Kuăn pơlê kal ki klâi pro ki mê tơdrêng amê hlối oh tá tơvâ tơvân. Thế tăng hên kăn ƀô̆ cheăng ‘na luât. Tâng ai mơngế Jarai mê kô hlê nâl Jarai tâ, mơngế Xuăn rơkê chêh pro hlá mơ-éa, la ôh tá hlê nâl kuăn ngo. A púi vâ thế ai kăn ƀô̆ kuăn ngo há”.

Vâ tơdroăng tơmâng xo tơdroăng hnê tối dêi kuăn pơlê châ tơƀrê, mâu kăn cheăm tơring ƀă mâu khu tơrŭm cheăng khu grup a cheăm Biển Hồ hiăng tơbleăng hnê tối troh lâp lu. Hlá mơ-éa xiâm ki chêh ƀă ki chêh rah tơdroăng kal tê ‘na tơdroăng tơkêa pro rế lĕm châ đăng tung kơmăi điê̆n tưh ƀă hlối tơbleăng a tíu pêi cheăng dêi cheăm, hngêi kuăn pơlê hmâ tơkŭm hôp..., kum kuăn pơlê châ nâi mâu tơdroăng tŭm tâi tâng.

Jâ R’Com H’Myữ - Kăn hnê ngăn Vi ƀăn Măt trâ̆n Tơnêi têa Việt Nam cheăm Biển Hồ - ăm ‘nâi: Tơdroăng tung rơ’jíu cheăm, mâu tơdroăng tung măng pơlê pơla, kơhnâ hnê tối, pơxúa roh veăng hnê tối mê:

“Rêm hâi, a 5 chôu 30 phut tá peăng kơxo ƀă kơxê, loa cheăm xuân mơ‘no. Ing kơnôm tơmâng, ing zalo ƀă facebook, mê măt trâ̆n tơnêi têa hiăng tơbleăng ăm mâu ngế pơkuâ cheăng măt trâ̆n pa xôp thôn, pơlê na troăng hơlâ dêi rêm râ ‘na tơmot kong pơlê ƀă pơlê kong kơdrâm Pleiku, xuân môi tiah cheăm bêng. Nôkố kuăn pơlê hiăng ‘nâi tơdroăng pro rế lĕm’’ .

Tơdrêng ƀă cheăm Biển Hồ, mâu tíu pêi cheăng râ cheăm tung lâp kong pơlê Gia Lai xuân tơbleăng xo tơdroăng kuăn pơlê veăng tơpui tối na troăng rơhlâ tơ’mot mâu cheăm. Mâu tơdroăng pêi pro châ  xúa rơkê, tá tơdroăng têk kŏng tiâ vâ a mâu roh hôp dêi kuăn pơlê, lơ xoăng ăm phĭu troh a tơrêm hngêi ƀă mâu kuăn pơlê ki ôh tá veăng hôp tơdrêng. Inâi kuăn pơlê châ séa ngăn nhên, tơniăn ôh tá lôi ngế ki lâi.

Hdrối mê, a Rôh hôp má 19 Khu kăn xiâm Đảng ƀô̆ kong pơlê Gia Lai hneăng 16 (po rơdâ), kong pơlê Gia Lai hiăng môi tuăn troăng hơlâ  kơdroh ing 218 tíu pêi cheăng râ cheăm chu ối 77 tíu pêi cheăng. Klêi hiăng xo tâi tơdroăng kuăn pơlê veăng tối,  Hô̆i đong kuăn pơlê rêm râ ƀă Vi ƀan Măt trâ̆n tơnêi  têa Việt Nam séa ngăn, tơkŭm tâi tâng, pơtroh ăm râ tơring ƀă râ kong pơlê séa ngăn, pơkâ tung mâu rôh hôp dêi Hô̆i đong kuăn pơlê rêm râ.

Drêng tíu pêi cheăng  ki nếo châ mơjiâng kô pêi tơdrêng mâu hvêa prôk  vâ pê klêi tơdroăng cheăng kăn bô̆, ôh tá lôi dế rá tơdroăng cheăng gum kuăn pơlê.