Tơpui a rôh trâm kuăn pơlê, pôa Lương Cường, Kăn xiâm hnê ngăn tơnêi têa mơnhên tối khât mâu rơkong tơpui tối tơdrăng, tro cho mơhno hnoăng cheăng pôu râng, ivá khŏm mơ-eăm ƀă tơdroăng mơnhông kro mơdrŏng ƀă ivá kâi rêh dêi tơnêi têa. Mâu rơkong tơpui tối mơhno tơdroăng ki phiu ro drêng mâu tơdroăng pơkâ nếo ‘na kăch măng dêi Tơnêi têa; tơdroăng ki veăng gum rơdêi, tơdâng dêi dêi khu pơkuâ tơdroăng kal kí, mâu khu mơdró kâ ƀă mâu kuăn pơlê, veăng gum pêi châ mâu tơdroăng ki tơƀrê khât tung mâu kơvâ cheăng kâ rêh ối, pơlê pơla cheăng bêng, gâk kring a kong pơlê.

Tơdrêng amê mâu kuăn pơlê xuân pâ thế hên tơdroăng ki tá hâi tơtro sap ing tơdroăng ki ai khât tơdjâk troh tơdroăng rêh ối kuăn pơlê kal châ tŏng gum, pơkâ tơleăng.

Kơxo rơtế tung hâi, a Tíu xối tơbâ ton nah tơnêi têa Ngã Ba Giồng (cheăm Xuân Thới Thượng, tơring Hóc Môn), pôa Lương Cường, Kăn xiâm hnê ngăn tơnêi têa hiăng pleăng reăng, tâp nhăng mơhno hiâm mơno mơnê, tơbâ troh hnoăng kan dêi Pôa Hồ Chí Minh ƀă mơnê mâu vâi pú cho kăn pơkuâ hneăng hdrối dêi Đảng, mâu râ pơkuâ Kăch măng, mâu ngoh khên tơnôu ki hiăng hlê, kuăn pơlê ki hiăng hlâ xua tơniăn krê dêi hdroâng mơngế, xua hơniâp lĕm dêi Kuăn pơlê.