Kơxo lơ 22/4, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ roh hôp ƀă mâu khu xiâm, kơvâ cheăng vâ mơnhên tơdroăng, tơpui troăng pro tơniăn hnoăng mơhá, kơxô̆ liăn ƀă tơmeăm tê, rôe ngi kong têa ê. Pôa Phạm Minh Chính, Ngế pro xiâm hnê ngăn tơnêi têa tối ăm ‘nâi, klêi kơ’nâi tơbleăng troăng hơlâ hnoăng mơhá dêi Mih, Chin phuh hiăng ai hên hĭn troăng pêi teăm tơdrêng, ƀeăn ƀĕng ‘na kal kí, tơpui kâ ƀă kong têa ê; hbrâ tơbleăng Pơkâ dêi Chin phuh, kơdroh mâu tơdroăng xo hnoăng mơhá ƀă mâu tơmeăm dêi Mih vêh a 0. Troh nôkố, mâu tơdroăng tơkêa bro dêi Mih tơmâng troh xuân pơtối châ tơleăng tiô luât ƀă môi tuăn pơla 2 tơnêi têa.

Hdrối mâu tơdroăng ki nếo, Ngế pro xiâm hnê ngăn tơnêi têa pơkâ thế la ngiâ thế ƀeăn ƀĕng, tơmiât pêi rơkê, khên tơnôu tơpui tơno; mơnhông mâu túa ki rơkê tơtro hiăng ai sap ing hdrối nah troh nôkố vâ tơpui tơno. ‘Na pơkâ pêi, Ngế pro xiâm hnê ngăn tơnêi têa tối rơdêi tơdroăng pêi tiô mâu hnê mơhno dêi Khu xiâm kal kí, Kăn xiâm pơkuâ hnê ngăn Đảng, Chin phuh, Ngế pro xiâm hnê ngăn Chin phuh; séa ngăn pơkâ dêi peăng Mih vâ mơjiâng troăng pêi; mơnhên tơpui tơno cho troăng pêi ki kal, ki xiâm vâ mơdêk tơdâng tơ’mô tê mơdró Mih krá tơniăn, ton xŏn.