Kơxê hâi lơ 22/4, a hngêi kân Kuô̆k hô̆i hiăng po hôp Khu kăn Đảng Kuô̆k hô̆i ƀă Khu kăn Đảng Chin phuh ‘na Rôh hôp má 9, Kuô̆k hô̆i hneăng 15. Tơbleăng a rôh pơxiâm Hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, rôh hôp má 9, Kuô̆k hô̆i hneăng 15 pơxiâm po a hâi lơ 5/5 (klêi rôh pơtê Leh lơ 30/4 ƀă lơ 1/5), châ klâ chiâng 2 rôh vâ séa ngăn, pơkâ tơdroăng cheăng ki kân, hên tơdroăng kal pêi pro tơdrêng, tơdroăng kâl hlối châ Tíu xiâm môi tuăn pêi pro tiô troăng hơlâ a rôh Hôp  rôh má 11.

Tiô tối hdrối rôh hôp mê kô séa ngăn, pơkâ 45 tơdroăng kal ‘na mơjiâng luât ki tơdjâk troh tơdroăng pro rế lĕm tíu pêi cheăng rêm râ, rah xo iâ mơngế pêi cheăng; 14 khu tơdroăng kal ‘na cheăng kâ-rêh ối, liăn ngân tơnêi têa, séa ngăn ƀă mâu tơdroăng kal ki ê.

A rôh Hôp, pôa Phạm Minh Chính, Ngế pro xiâm hnê ngăn tơnêi têa  tối: Chin phuh kô mơ-eăm hên, tơmâng ƀă pêi tro khâp mâu tơdroăng veăng hnê tối vâ Rôh Hôp châ tơƀrê. Mâu tơdroăng kal pơtroh ăm Kuô̆k hô̆i hiăng châ hbrâ nhên, ing tơdroăng pơkâ ki pơxúa ăm tơnêi têa, hdroâng mơngế mê ki má môi. Ngế pro xiâm hnê ngăn tơnêi têa tối loi khât, ƀă tơdroăng hnê mơhno dêi Đảng, tơrŭm môi dêi Chin phuh, ki môi tuăn dêi Kuô̆k hô̆i, veăng môi tuăn dêi kuăn pơlê, rôh hôp má 9 kô pê klêi  tơniăn; pơtối tơbleăng troh lâp lu, trâu rơdâ ‘na tơdroăng ki kal dêi tơdroăng pro rế lĕm mơngế pêi cheăng ăm tơnêi têa.