Tơmâng xo rơkong krếo thế dêi Kăn xiâm pơkuâ hnê ngăn Đảng Khu kăn Xiâm Đảng Nhân yân Kăch măng Lếo, Kăn xiâm hnê ngăn tơnêi têa Kŏng hoa Yân chuh Nhân yân Lếo Thongloun Sisoulith, a kơxê hâi lơ 24/4,  Pôa Lương Cường Kăn xiâm hnê ngăn tơnêi têa pơkuâ djâ Khu kăn xiâm tơnêi têa Việt Nam lo ing Hà Nội lăm pôu râ Kăn xiâm tơnêi têa troh Lếo sap hâi lơ 24 troh hâi lơ  25/4/2025.   

Ƀă tơdroăng mơ-eăm pêi mâu tơdroăng tơhrâ râ kăn xiâm, hneăng lăm pôu rôh kố dêi pôa Lương Cường, Kăn xiâm hnê ngăn tơnêi têa pin troh a Lếo ai pơxúa kal khât, pơtối mơho troăng hơlâ, luât pơkâ ki kal dêi Đảng, Tơnêi têa Việt Nam ngăn nhoăm ƀă pêi ahdrối tơrŭm cheăng ki kân, tơrŭm môi tuăn krá kâk, tơrŭm tung tŭm tơdroăng cheăng pơla Việt Nam - Lếo; mơdêk loi nhoăm tơdroăng kal kí, hmâ tơrŭm krá pơla mâu kăn xiâm péa tơnêi têa; đi đo ngăn Tơnêi têa Lếo cho tơnêi têa tơrŭm ki kal  dêi Việt Nam - Lếo, cho môi tung mâu tơdroăng pêi ahdrối tung tơdroăng tơbleăng pêi tiô luât  tơpui kâ dêi tơná, tối mơnê tơdroăng veăng gum dêi Việt Nam ƀă tơdroăng pơ’lêh nếo a Lếo.