Pôa Lương Cường, kăn xiâm hnê ngăn tơnêi têa mơnhên tối khât klêi kơ’nâi rôh tơpui tơno pơla Ngế xiâm pơkuâ ngăn lêng Việt Nam, Kăn xiâm phŏ pơkuâ ngăn Đảng lêng tơnêi têa - pôa Phan Văn Giang prế pôa Trương Hựu Hiệp, Kăn xiâm phŏ hnê ngăn Đảng lêng Tơnêi têa, phiu ro hlo tơrŭm cheăng lêng pơla péa pâ pơtối ai mơnhông nếo, tơƀrê, tơtro ƀă mâu hlá mơ-éa ki hiăng kĭ tơkêa pơla kăn pơkuâ péa Đảng, péa tơnêi têa.

Kăn xiâm hnê ngăn tơnêi têa pơkâ thế tung la ngiâ ah Kăn Đảng lêng tơnêi têa, Khu xiâm pơkuâ ngăn lêng péa tơnêi têa pơtối mơdêk, pro trâu hngế tâ nếo tơrŭm cheăng lêng pơla péa pâ ing tơdroăng cheăng ki pơtroh mâu khu râ kăn, malối cho khu râ kăn xiâm; rak vế tơƀrê mâu tơdroăng tơrŭm cheăng dế ai nôkố.

Tối nhên hơnăm 2025 cho hơnăm Việt Nam tơbâ 80 hơnăm mơjiâng tơnêi têa ƀă 70 hơnăm tơrŭm cheăng tơpui kâ Việt Nam – Sinuâ, pôa Trương Hựu Hiệp tối rơdêi péa pâ pơtối môi tuăn ƀă troăng ki kăn pơkuâ péa Đảng, péa tơnêi têa hiăng tối; tơdrêng amê hlối thăm mơdêk tơrŭm tung mâu kơvâ cheăng, vâ mơjiâng Pơlê pơla tối ăm dêi rơpó tơdroăng ki rơkê plĕng ai pơxúa tung la ngiâ.