âi lơ 21/9, a Seattle, pôa Lương Cường, Kăn xiâm hnê ngăn tơnêi têa tơdah Khu kăn Kuô̆k hô̆i kong pơlê Oregon xua Kuô̆k hô̆i râ má péa Nguyễn Bá Lộc pơkuâ djâ, drêng veăng hôp a Rôh hôp tơpui tơno tơdjuôm khu râ kăn xiâm Hneăng hôp Khu lâp kong têa hneăng 80. Kăn xiâm hnê ngăn tơnêi têa mơnhên tối Oregon cho tíu cheăng khoa hok, kong ngê̆ chal nếo, bán dẫn ƀă on tơhrik ‘mâi pro xiâm dêi Mih, cho kong têa tơrŭm cheăng ki kal dêi Việt Nam tung tơrŭm cheăng ƀă thăm mơnhông krá tơniăn.

Việt Nam hbrâ rơnáu pro tơ’lêi hlâu ăm khu mơdró kâ, tíu hnê cheăng pêi Oregon po rơdâ tơrŭm cheăng, hriăn plĕng a Việt Nam; pơkâ thế pơtối tŏng gum tơrŭm cheăng pơla péa pâ, mơdêk tơrŭm cheăng kâ, tê mơdró, khoa hok – kong ngê̆, kơmăi kơmok bán dẫn, hnê cheăng pêi ăm mâu ngế pêi cheăng rơkê. Kăn xiâm hnê ngăn tơnêi têa púi rơhêng vâ Mih rĕng mơnhên túa pơkâ cheăng kâ kơchơ tê mơdró dêi Việt Nam ƀă ăm Việt Nam lo ing inâi iâ châ tê tơmeăm ngi kong têa tiô kơmăi kơmok chal nếo.