Tung hâi pêi cheăng ki apoăng dêi Kuô̆k hô̆i rôh má 8, Kuô̆k hô̆i hneăng 15, kơxê hâi lơ 21/10, Kuô̆k hô̆i hiăng pôk Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam hneăng hơnăm 2021-2026. Klêi pôk, pôa Lương Cường Ngế cheăng tung Khu xiâm Kal kí, Kăn xiâm hnê ngăn Đảng hiăng châ Kuô̆k hô̆i pôk pro Kăn xiâm hnê ngăn tơnêi têa kŏng hoa xah hô̆i chuh ngiah Việt Nam hneăng hơnăm 2021-2026.

Pơkâ pôk pôa Lương Cường pro Kăn xiâm hnê ngăn tơnêi têa hiăng châ mâu kăn Kuô̆k hô̆i têk kŏng vâ ai hên kơxô̆ ngế vâ môi tuăn. Ƀă hlá cơ hơ lŏng trĭng, Kăn xiâm hnê ngăn tơnêi têa kŏng hoa xah hô̆i chuh ngiah Việt Nam hneăng hơnăm 2021-2026  pôa Lương Cường to pro kăn:  “ Thế môi tuăn ƀă Tơnêi têa, ƀă kuăn pơlê, ƀă Luât tơnêi têa kŏng hoa xah hô̆i chuh ngiah Việt Nam; mơ-eăm pê klêi hnoăng cheăng ki Đảng, Tơnêi têa ƀă kuăn pơlê pơcháu”.  

Pôa Lương Cường kot mâ lơ 15/8/1957; pơlê xiâm: cheăm Dữu Lâu, pơlê kong kơdrâm Việt Trì, kong pơlê Phú Thọ. Pôa Lương Cường hdrối nah hiăng pro mâu kăn cheăng: Chính ủy Quân đoàn 2; Chính ủy Quân đoàn 3. Khế 1/2016, a Hneăng hôp kân tung lâp tơnêi têa rôh má 12 dêi Đảng, pôa Lương Cường châ rah xo pêi cheăng tung Khu xiâm Đảng.

Hneăng hôp roh má môi Khu kăn xiâm Đảng, hiăng pôk pôa Lương Cường  pêi cheăng  tung Khu kăn hnê ngăn Tíu xiâm Đảng hneăng 12. Khế 4/2016, pôa Lương Cường châ Khu xiâm kal kí pơkâ xoăng pêi hnoăng cheăng pro Ngế Pơkuâ Khu xiâm kal kí, Khu lêng kuăn pơlê Việt Nam. Khế 1/2019, pôa Lương Cường châ pôk pro Đăi tưŏng .

A hneăng hôp mâu kăn tâi tâng tung lâp tơnêi têa rôh má 13 dêi Đảng, pôa Lương Cường châ rah xo pêi cheăng tung Khu kăn Xiâm. A hneăng hôp rôh má môi, khu kăn Tíu xiâm Đảng, pôa Lương Cường châ  rah xo pêi cheăng tung Khu xiâm kal kí hneăng 13. Khế 5/2024, Khu xiâm kal kí hiăng pơkâ xoăng ăm Đăi tưŏng Lương Cường cheăng tung Khu xiâm Kal kí, Ngế pơkuâ Khu xiâm Kal kí lêng kuăn pơlê Việt Nam veăng  pêi hnoăng cheăng tung Khu kăn hnê ngăn Đảng ƀă pro Ngế pơkuâ hnê ngăn Đảng.