Kơxê hâi lơ 13/11, pôa Nguyễn Phú Trọng Kăn xiâm pơkuâ hnê ngăn Đảng hiăng tơdah pôa Olaf Scholz - Ngế pro xiâm hnê ngăn kong têa Alơmăng lăm pôu Việt Nam. Pôa Nguyễn Phú Trọng khĕn kơdeăn tơdrăng cheăng tơniăn lĕm dêi hneăng hôp tơpui tơno pơla Ngế pro xiâm hnê ngăn kong têa Alơmăng ƀă pôa Phạm Minh Chính - Ngế pro xiâm hnê ngăn tơnêi têa pin, hâk mơnê tơdroăng tơhrâ tơrŭm cheăng ki mâu khu xiâm, kơvâ cheăng péa pâ hiăng kĭ tơhrâ; mơhno ki kơdo mơ-eăm dêi Việt Nam nhoăm tơrŭm cheăng ƀă Alơmăng. 

Kăn xiâm pơkuâ hnê ngăn Đảng tơpui tơno ƀă Ngế pro xiâm hnê ngăn kong têa Alơmăng mâu tơdroăng vâ pêi cheăng, túa vâ pêi cheăng ki rơdêi vâ mơdêk tơrŭm tung tâi tâng mâu kơvâ cheăng, mơdêk tơrŭm cheăng tơƀrê, pơxúa, mơnhông tơrŭm cheăng pơla péa tơnêi têa rế mơnhông tơxâng ƀă tơdroăng púi vâ ƀă tơmeăm khoăng dêi péa pâ. Mơnê mâu hnoăng hiăng châ chiâng pêi pro ki tơƀrê dêi Việt Nam tung mơnhông tơnêi têa. Ngế pro xiâm hnê ngăn kong têa Alơmăng tối, Alơmăng nhoăm tơrŭm cheăng pơla Alơmăng - Việt Nam, xuân môi tiah nhoăm hnoăng cheăng ki rơdêi lâp plâi tơnêi dêi Việt Nam, tung mê, ai hnoăng cheăng dêi Việt Nam a ASEAN.