VOV4.Xơ Đăng - Pơtối tơdroăng pêi cheăng a Quảng Ngãi, pôa Nguyễn Xuân Phúc, Kăn xiâm hnê ngăn tơnêi têa hiăng ai roh pêi cheăng ƀă Khu pơkuâ hnê ngăn cheăng Đảng kong pơlê Quảng Ngãi. Xông tơpui hnê mơhno a roh pêi cheăng, pôa Nguyễn Xuân Phúc tối, tung tơdroăng pá puât môi tiah hơnăm kố nah laga khu râ kăn pơkuâ ƀă kuăn pơlê Quảng Ngãi hiăng rŭm môi tuăn pêi pro mâu troăng pêi ki tơtro mơnhông mơdêk cheăng kâ – rêh ối pơlê pơla; tơleăng hên tơdroăng ki ối tơvâ tơvân, ti tăng troăng pêi, túa pêi mơnhông mơdêk ƀă troăng lo châ tơƀrê.

Pôa Nguyễn Xuân Phúc, Kăn xiâm hnê ngăn tơnêi têa xông tơpui a roh pêi cheăng

Mâu tơdroăng ƀlêi trâng hơnăm 2021 cho xiâm kối mơnhông mơdêk ki kal ƀă Quảng Ngãi tung la ngiâ. Tung la ngiâ, Kăn xiâm hnê ngăn tơnêi têa pơkâ thế Đảng ƀô̆, khu râ kăn pơkuâ ƀă kuăn pơlê Quảng Ngãi mơnhông mơdêk tơdroăng cheăng kăch măng, pro pơxúa drêng ai tơ’lêi hlâu tŭm môi Việt Nam vâ mơnhông mơdêk. Kong pơlê kal séa ngăn pơkâ tâi tâng ƀă dâi lĕm ƀă tơmiât pêi ton xŏn troh hơnăm 2050, kơpong cheăng kâ Dung Quất Quảng Ngãi kum pơ’lêh cheăng kâ krá tơniăn.

A Sa Ly tơplôu ƀă tơbleăng