Kơxo hâi lơ 14/4, a Hoà Lạc, pôa Phạm Minh Chính - Ngế pro xiâm hnê ngăn Chin phuh hiăng lăm pôu, pêi cheăng ƀă Đại học Quốc gia Hà Nội hlối ăm loăng ngiât ăm sinh viên Đại học Quốc gia Hà Nội. A rôh pêi cheăng, pôa Phạm Minh Chính - Ngế pro xiâm hnê ngăn Chin phuh hiăng tơmâng kăn pơkuâ hngêi trung Đại học Quốc gia Hà Nội tối tơbleăng tơdroăng tơkŭm po, tơdroăng cheăng pêi tối tơdjuôm, tung mê, ai tơdroăng hnê mâu ngế rơkê ƀă mâu ngế vâ pêi cheăng thế rơkê xuân môi tiah tơdroăng hnê ƀă tí tăng ‘nâi plĕng khoa hok kơvâ  hriăn pro Tơmeăm ki chiâng hrik ontơhrik dêi Đại học Quốc gia Hà Nội. 

Cho môi tung mâu hngêi trung hnê, tí tăng hriăn plĕng khoa hok ki má môi, Đại học Quốc gia Hà Nội hiăng hbrâ mơjiâng ƀă tơbleăng troăng cheăng khoa hok kŏng ngê̆  ƀă pơ’lêh hriăn plĕng ki nếo dêi Đại học Quốc gia Hà Nội pơla hơnăm 2021-2030 vâ mơhno troăng mơnhông mơdêk khoa hok kŏng ngê̆ tung la ngiâ rế rơkê tâ, hlối vâ rế tơƀrê tung mơnhông mơdêk Đại học Quốc gia Hà Nội chiâng đại hok ki rơkê, pơ’lêh nếo tơdroăng hriăn plĕng.