A roh tơdah, pôa Phạm Minh Chính, Ngế pro xiâm hnê ngăn Chin phuh kheăn kơdeăn hnoăng cheăng krê dêi Ngế pro xiâm phŏ hnê ngăn kong têa Kul tung tơdroăng thăm trâm mâ tơpui tơno, mơhno khôi túa lĕm tro, trâm tơpui tơno pơla kuăn pơlê, tơdroăng rŭm môi tuăn ƀă nhŏng o tơnêi têa chê dêi pó pơla péa Chin phuh ƀă Kuăn pơlê péa tơnêi têa hên hnoăng pêi cheăng; tơdrêng amê pơkâ thế Ngế pro xiâm phŏ hnê ngăn kong têa Kul pơtối tŏng kum, tơmâng, môi tuăn ƀă pro tơ’lêi hlâu ăm kuăn pơlê, khu tê mơdró Việt Nam ƀă pơlê pơla mơngế xiâm rêi Việt Nam rêh ối, pêi cheăng kâ, tê mơdró tơniăn ƀă tơ’lêi hlâu a kong têa Kul.

Péa Ngế xiâm môi tuăn tung la ngiâ, kal thăm tơrŭm tâ mê nếo pơla mâu kong pơlê, ki má lối cho mâu kong pơlê ai tơdjuôm troăng tơkăng kong, thăm trâm mâ tơpui tơno pơla kuăn pơlê ƀă hên troăng pêi pơxúa ƀă châ tơƀrê, ki rơhêng vâ tối ing mâu tơdroăng pêi dêi péa Khu tơrŭm cheăng.