Hâi lơ 10/11, a pơlê kong xiâm Phnom Penh, kong têa Kul, klăng roh veăng Hneăng hôp Khu râ kăn xiâm ASEAN 40, 41 ƀă mâu hneăng hôp khu râ kăn xiâm ki tơdjâk, pôa Phạm Minh Chính, Ngế pro xiâm hnê ngăn Chin phuh hiăng ai roh trâm mâ ƀă pôa Phankham Viphavanh, Ngế pro xiâm hnê ngăn kong têa Lếo. A roh trâm mâ, Péa Ngế pro xiâm hnê ngăn tơnêi têa phiu ro mâu tơdroăng mơnhông mơdêk lĕm dêi tơrŭm cheăng pơla péa pâ tung mâu hơnăm achê kố, ki má lối tung kơvâ kal kí – tơpui kâ ƀă kong têa ê, gâk kring – cheăng lêng, tê mơdró ƀă mơ’no liăn cheăng; mơnhên pơtối nhuô̆m ƀă kơjo má môi ƀă tơdroăng rak vế, ƀă mơnhông mơdêk tơrŭm cheăng nhŏng o kân, rŭm môi tuăn ki phá tơ-ê ƀă tơrŭm tâi tâng Việt Nam – Lếo rế hía rế trâu hơngế, châ tơƀrê, djâ pơxúa ăm kuăn pơlê péa tơnêi têa.

Tơpui ‘na mâu tơdroăng lâp plâi tơnêi ƀă kơpong rơtế rơhêng vâ ‘nâi plĕng, péa pâ môi tuăn pơtối thăm tơrŭm krá tơniăn, đi đo tơpui tơno, kơ-êng dêi pó a mâu hneăng hôp tơpui tơno rêm pâ kơpong ƀă lâp plâi tơnêi, ki má lối cho ASEAN, Khu lâp kong têa ƀă mâu troăng tơrŭm kơpong, kum rak rŭm môi tuăn, môi tuăn hnoăng tíu xiâm dêi ASEAN hdrối mâu pơloăng mơnúa tung rơxông nếo.