Hdrối mê, kơxê hâi lơ 13/11, klêi kơ’nâi leh tơdah păng ‘nâng, pôa Phạm Minh Chính, Ngế pro xiâm hnê ngăn Chin phuh hiăng tơpui tơno ƀă pôa Olaf Scholz - Ngế pro xiâm hnê ngăn kong têa Alơmăng. A roh hôp tơpui tơno, pôa Phạm Minh Chính kheăn kơdeăn roh lăm pôu pêi cheăng dêi pôa Olaf Scholz cho kơnía kal khât, djâ tơrŭm cheăng pơla péa tơnêi têa troh hneăng mơnhông mơdêk nếo. Tung tơdroăng loi tơngah ƀă tơdrăng, péa Ngế pro xiâm hnê ngăn tơnêi têa hiăng tơpui tơno tŭm têk ‘na tơdroăng mơnhông mơdêk cheăng kâ – rêh ối pơlê pơla rêm kong têa, tơrŭm cheăng pơla péa pâ ƀă mâu tơdroăng kơpong, lâp plâi tơnêi rơtế rơhêng vâ ‘nâi plĕng.

Péa Ngế pro xiâm hnê ngăn tơnêi têa hiăng môi tuăn mâu troăng pêi kân vâ thăm pêi pro rơdêi tơrŭm cheăng pơla péa tơnêi têa. Péa tơnêi têa hiăng môi tuăn thăm tơpui tơno khu mâu râ, ki má lối râ kăn xiâm, tung tâi tâng mâu ƀâng Đảng, Tơnêi têa, Chin phuh, Kuô̆k hô̆i, pơtối po rơdâ pêi pro châ tơƀrê troăng tơrŭm cheăng pơla péa pâ. ‘Na tơdroăng cheăng kâ – tê mơdró, péa Kăn xiâm pơkuâ mơhnhôk mâu kơ koan, khu tê mơdró péa tơnêi têa pơtối pêi pro tŭm, châ tơƀrê Pơkâ tê mơdró tơ’lêi hlâu xua Việt Nam – EU (EVFTA).