Mâu mâu roh hôp mê, mâu kăn xiâm ASEAN ƀă khu tơrŭm cheăng hiăng vêh mơnhên tối ƀă pơkâ mơ’no troăng hơlâ vâ mơnhông tơrŭm cheăng pơla péa pâ. Mâu kong têa tơrŭm cheăng vêh tối ngăn nhoăm khât tơrŭm cheăng ƀă ASEAN, tơkêa kô pơtối rơtế ƀă ASEAN thăm mơdêk tơrŭm cheăng, ƀă hnối  hbhrâ mâu hnoăng cheăng vâ ví ing xahpá, pơloăng mơnúa, veăng kum rak vế hnoăng cheăng tung kơpong châ po rơdâ, tŭm têk, tơdrăng lĕm, rak vế krá khât luât xiâm lâp plâi tơnêi, tung mê, ASEAN cho ngế ki djâ troăng xiâm ki kal khât.

A hneăng hôp khu kăn xiâm ASEAN-Sinuâ roh má 25, Ngế pro xiâm hnê ngăn kong têa Sinuâ tối nhên, ASEAN kơjo kum tung hnoăng cheăng vâ tŏng veăng ăm mâu kong têa tung kơpong dêi tơná, vêh mơnhên tối, cho kal nhoăm khât hnoăng cheăng dêi ASEAN tung rak ngăn mâu hnoăng cheăng tung kơpong, pói rơhêng vâ rơtế ƀă ASEAN pơkâ pêi pro châ tơƀrê khât tung tơrŭm ƀă mâu kong têa ki ê tiô kơ tơdroăng ki hên kơvâ cheăng, pơtối tơkêa pêi pro vâ kum ASEAN vêh mơjiâng mâu kong têa tung kơpong ƀă tung lâp plâi tơnêi.

Mơgêi hneăng hôp, khu kăn xiâm mâu kong têa tung ASEAN ƀă Sinuâ tối tơbleăng, rơkong tơbleăng tối koh tơbâ 20 hơnăm Tối pơtâng vêh mơnhên tơdroăng ki tơrŭm cheăng a Biển Đông, dó inâi DOC, hnối vêh mơnhên tối ki kal dêi DOC ƀă tơdroăng rak vế hơniâp lĕm, kring vế tơniăn, krá khâp a kơpong Biển Đông, Rơkong tối tơbleăng mê ai tối tơdjuôm ‘na thăm mơdêk tơdroăng cheăng krá ton ƀă tơniăn, tung mê, ai tối ‘na tơrŭm cheăng rak vế tơniăn ‘na kế kâ.