Kơxê hâi lơ 10/11/2022, pôa Phạm Minh Chính, Ngế pro xiâm hnê ngăn tơnêi têa hiăng rơtế Khu râ kăn pơkuâ mâu kong têa ASEAN veăng roh tơpui tơno ƀă kăn teăng mâ Hneăng hôp Kuô̆k hô̆i râ má môi ASEAN (AIPA), Droh rơtăm ƀă Hô̆i đong hnê mơhno tê mơdró ASEAN (ABAC). Kố cho mâu tơdroăng pêi apoăng tung mâu tơdroăng Hneăng hôp Khu râ kăn xiâm ASEAN roh má 40, 41 ƀă mâu Hneăng hôp Khu râ kăn xiâm ki tơdjâk.

Pôa Phạm Minh Chính, Ngế pro xiâm hnê ngăn Chin phuh rơtế khu râ kăn pơkuâ mâu kong têa ASEAN phiu ro tơdroăng tơkŭm po mâu roh tơpui tơno, tơmâng rơkong tơpui ing mâu kăn teăng mâ mâu Khu phá tơ-ê dêi pó. Mâu kong têa mơnhên tơdroăng rơtế dêi AIPA rơtế ƀă Chin phuh mâu kong têa ASEAN. Mâu kong têa pơkâ hên troăng pêi thăm châ tơƀrê tơrŭm pơla tơdroăng pêi pro luât ƀă mơjiâng luât, tung mê thăm séa ngăn, tah lôi mâu tơdroăng ki mơdât, mơ-eăm ‘mâi rơnêu luât tơtro, pro tơ’lêi hlâu pêi pro mâu tơdroăng môi tuăn, tơdroăng tơrŭm, ki má lối tung mâu kơvâ châ tơmâng pêi pro nôkố môi tiah pơ’lêh pêi cheăng xúa kŏng ngê̆, pơ’lêh xúa têa châu, têa kơxăng, hbrâ ví kong prâi hơ’lêh ƀă hía hé.

Mâu kăn pơkuâ mơnhên droh rơtăm ai hnoăng kal tung tơdroăng thăm tơdjêp ƀă hbrâ ví pơloăng mơnúa tơdjuôm a kơpong, kum pơkâ pêi la ngiâ dêi mâu kong têa ASEAN.