Pôa Phạm Minh Chính, Ngế pro xiâm hnê ngăn tơnêi têa tối nhên: ‘no liăn pêi cheăng tơnêi têa hơnăm 2025 ai hên tơdroăng pêi tơƀrê. Tung 8 khế hdrối, lâp tơnêi têa ‘no liăn pêi cheăng tơnêi têa 409 rơpâu rơtal liăn, châ 46,3% túa pơkâ Ngế pro xiâm hnê ngăn Chin phuh pơcháu, tâk 5,9% ‘na kơxô̆ tâk chu ƀă tâk vâ chê 135,3 rơpâu rơtal liăn ‘na tơdroăng pơkâ vâ ‘no tâi tâng vâ pơchông ƀă khế kố hơnăm 2024. Ngế pro xiâm hnê ngăn tơnêi têa krếo thế mơnhông hiâm mơno pôu râng khât malối cho tung ‘no liăn pêi cheăng tơnêi têa, tơdjuôm ivá, môi hiâm mơno vâ tơkâ luâ xơpá, pơloăng, pôi tá ăm kế tơmeăm pro tro hrá, pôi tá ăm ai liăn la ôh tá chiâng vâ hrê; rah xo tro ngế ki xo pro tơmeăm ƀă pơkâ thế pêi pro tro tơdroăng tơhrâ, tro tơdroăng hâi khế pro klêi ƀă séa ngăn rêm măng tĭng, teăm pơhlêh khu ki xo pro ki ôh tá châ tiô pơkâ.

Ing mê, mơdêk ‘no liăn pêi cheăng tơnêi têa, rak tơniăn ai tŭm tơdroăng ki rak tơniăn, tơƀrê, mơdêk ki rơkê dêi tơdroăng cheăng pêi, tro pơkâ, túa pơkâ, mơ-éa, pôi tá ăm ai tơdroăng ki kâ kơhveăm, pro mơhrê liăn ngân tê kơtê.