Hâi lơ 14/4, pôa Phạm Minh Chính, Ngế pro xiâm hnê ngăn Chin phuh hiăng troh pôu ƀă pêi cheăng a Hngêi trung Đăi hok FPT ƀă Kŏng ti pêi cheăng tiô rơnó Phần mềm FPT. Tơpui akố, pôa Phạm Minh Chính, Ngế pro xiâm hnê ngăn Chin phuh tối nhên, FPT cho khu mơdró kâ ki djâ troăng ahdrối ‘na hơ’lêh kơxô̆ a Việt Nam sap ing hơnăm 2016. FPT rơtế ƀă mâu khu mơdró kâ kong ngê̆ ki ê dêi Việt Nam hiăng hlo mơnhông tơƀrê, veăng kum ăm Việt Nam mơ-eăm, chiâng tíu bâ eăng ‘na kong ngê̆ thong tin tung mâu kơvâ cheăng.

Ngế pro xiâm hnê ngăn tơnêi têa tối nhên, tơkâ luâ mâu tơdroăng ki xơpá ƀă tơƀrê, troăng prôk dêi FPT tiô bối mơjiâng kong ngê̆ thŏng tin, kơchuâ bro mơjiâng phần mềm, mơjiâng bro chip cho troăng prôk ki tơtro má môi, tơtro ƀă FPT, tơtro ƀă tơdroăng pơkâ dêi kong têa ê, tơdroăng trâm dêi tơnêi pin. Ngế pro xiâm hnê ngăn Chin phuh hnê mơhno Khu ngăn hnê hriâm ƀă hnê mơjiâng tuăn ngoâ rơkê ƀă mâu khu râ kơvâ cheăng ki ai tơdjâk tơrŭm ƀă FPT rơtế hriăn ngăn, mơ’no túa vâ hnê mâu ngế cheăng rơkê veăng kum mơjiâng tơnêi têa Việt Nam rơdêi ƀă hơniâp ro.