Kơxê lơ 10/1, pôa Phạm Minh Chính, Ngế pro xiâm hnê ngăn Tơnêi têa kăn xiâm phŏ pơkuâ Khu râng liăn lâp plâi tơnêi IMF pơkuâ ‘na kơpong châu Á - Thái Bình Dương, jâ Antoinette Sayeh, dế ai rôh lăm pôu ƀă pêi cheăng ki apoăng a Việt Nam.  A rôh tơdah, tơpui tơno ‘na mâu tơdroăng ki pơloăng mơnúa, xơpá tung pơkâ mơ’no liăn cheăng tung hơnăm 2023 ‘na troăng kơdroh ‘na cheăng kâ tung lâp plâi tơnêi, mơni kô kơdroh ‘na tơdroăng ki tê kế tơmeăm ngi kong têa ê, xơpá ‘na mâu kế tơmeăm to kơnâ la liăn ngân ôh tá kơnâ yă ƀă hên ki ê châ jâ Antoinette Sayeh tối, pôa Phạm Minh Chính, Ngế pro xiâm hnê ngăn tơnêi têa ăm Chin phuh Việt Nam khŏm mơeăm hbrâ mơdât tơdroăng ki pro mơhrê liăn ngân tê kơtê, mơdêk mơnhông, rak vế tơniăn mâu tơdroăng ki kân dêi tơdroăng cheăng.

Ngế pro xiâm hnê ngăn tơnêi têa tối nhên: Rế pơloăng mơnúa, xơpá mê rế athế mơ-eăm tơkâ luâ. Rế xơpá, ôh tá tơniăn mê athế rế tơrŭm, môi tuăn. Việt Nam đi đo hbrâ rơnáu tơpui tơno, tơmâng mâu tơdroăng ki mơhnhôk, tiâ mơnhên dêi mâu khu tơrŭm kong têa ê, môi tiah IMF, Hngêi rak liăn lâp plâi tơnêi WB.