Kơxo lơ 14/11, Khu xiâm pơkâ túa cheăng – mơ’no liăn cheăng tơkŭm po roh hôp khu chêh hlá tơbeăng tơbleăng ‘na Hneăng hôp pêi pro Pơkâ kơxô̆ 23 –NQ/TW dêi Khu xiâm kal kí ‘na troăng mơnhông cheăng kâ – rêh ối pơlê pơla, rak tơniăn cheăng lêng, gâk kring kơpong Tây Nguyên troh hơnăm 2030 kô châ tơkŭm po a pơlê kong kơdrâm Đà Lạt, kong pơlê Lâm Đồng.

Pơtối mê, hneăng hôp kô tơkŭm po a hâi lơ 20/11/2022, ing pơkuâ dêi pôa Phạm Minh Chính, Ngế pro xiâm hnê ngăn Chin phuh. Ƀă dó inâi ‘’Mơnhông mơdêk krúa lĕm – tơtro – krá tơniăn’’. Kố cho hneăng hôp ‘’3 tung 1’’, châ tơkŭm po ƀă xiâm kối tơbleăng Tơdroăng pêi dêi Chin phuh pêi pro pơkâ kơxô̆ 23 ‘na troăng mơnhông mơdêk cheăng kâ – rêh ối pơlê pơla ƀă tơniăn cheăng lêng, gâk kring kơpong Tây Nguyên troh hơnăm 2030, tơmiât troh hơnăm 2045.

Tơdrêng amê, mơhnhôk mơ’no liăn cheăng, kơbông krếo tơdroăng tơmâng dêi mâu khu mơ’no liăn cheăng, khu tơrŭm tê mơdró tung tơnêi têa, lâp plâi tơnêi, mâu khu tơrŭm cheăng mơnhông mơdêk tung tơdroăng rơtế ƀă Chin phuh tung pêi pro mâu tơdroăng, pêi pro tơdroăng tơkêa bro mơ’no liăn cheăng ai kơnâ ƀă mơnhông mơdêk cheăng kâ – rêh ối pơlê pơla dêi kơpong Tây Nguyên.