Kơxo lơ 8/11, tơƀai chơ pôa Phạm Minh Chính, Ngế pro xiâm hnê ngăn Chin phuh pơkuâ djâ khu kăn xiâm Việt Nam hiăng lăm veăng hôp a Rôh hôp Khu kăn xiâm ASEAN rôh má 40, 41, mâu Rôh hôp Khu râ kăn xiâm ki ai tơdjâk ƀă lăm pôu kong têa Kul tiô rơkong krếo thế dêi pôa Samdech Techo Hun Sen, Ngế pro xiâm hnê ngăn kong têa Kul. Kố cho rôh lăm pôu kong têa Kul ki apoăng dêi pôa Phạm Minh Chính tung hnoăng cheăng Ngế pro xiâm hnê ngăn tơnêi têa xuân cho rôh lăm pôu ki apoăng dêi kăn pơkuâ xiâm Việt Nam troh a Kul tung hơnăm tơrŭm tơroâ Việt Nam – Kul 2022.

A mâu Rôh hôp khu râ kăn xiâm ASEAN, Ngế pro xiâm hnê ngăn Chin phuh Phạm Minh Chính kô ai ƀai pơchuât ki kal, tối ‘na túa tơmiât xuân môi tiah mâu tơdroăng pơkâ mơ’no dêi Việt Nam ‘mâi mơnhông tơrŭm, môi tuăn ƀă hnoăng cheăng tíu xiâm dêi ASEAN, mơdêk tơrŭm tung kơpong, mơdêk tơrŭm tung kơvâ cheăng ki péa pâ rơtế vâ ‘nâi plĕng, mơdêk tơrŭm pơla ASEAN ƀă mâu kong têa tơrŭm cheăng, ƀă tơpui tơno mâu tơdroăng tung lâp plâi tơnêi ƀă tung kơpong ƀă túa ki châ a chê tơdâng tơ’mô ƀă tơniăn lĕm.