Leh tơbâ 80 hơnăm Kăch măng khế Tơheăm, Hâi mơjiâng tơnêi têa lơ 2/9 ƀă 80 hơnăm hâi mơjiâng Kŏng an kuăn pơlê, kơmăng hâi lơ 25/8, a tíu pêi cheăng Chin phuh, pôa Phạm Minh Chính - Ngế pro xiâm hnê ngăn tơnêi têa trâm mâ, tơbâ mơnê mâu kăn ƀô̆ Khu tăng ‘nâi tơdroăng dêi Kŏng an ki veăng lăm tơplâ a peăng Hdroh tơnêi têa.

Ngế pro xiâm hnê ngăn tơnêi têa tối nhên Đảng, Tơnêi têa, Kuăn pơlê đi đo ta ah mơnê hnoăng veăng ‘no tơplâ hlâ rêh ki kân dêi rơpâu ngế kăn ƀô̆ kŏng an ki veăng lăm tơplâ, tung mê, ai vâ chê 1.000 ngế hiăng hlâ, hên ngế tro kroăng phâk, tôu pâm, tro tâ trếo ‘mêi, rong râ troh ta hlâ, lôi môi pâ kơxêng mơheăm a tíu tơplâ. Mê cho mâu tơdroăng ki hâk tơngăm, tơdroăng ki kơnía git dêi hdroâng mơngế ƀă mâu lêng Kong an kuăn pơlê khên tonôu.

Ngế pro xiâm hnê ngăn tơnêi têa pơkâ thế mâu kăn ƀô̆, khu xiâm, kong pơlê, malối Khu xiâm kong an pơtối rak vế pêi pro tơdroăng ki lĕm ing nah “Mơnê kơ mâu ai hnoăng’’, tơmâng tŏng gum ăm rơpŏng ai hnoăng tơnêi têa, rơpŏng kơtiê xơpá, malối cho kăn ƀô̆ kong an ki hdrối nah hiăng veăng lăm tơplâ a peăng Hdroh tơnêi têa.