VOV4.Xơ Đăng - A Hà Nội, pôa Phạm Minh Chính, Ngế cheăng tung Khu xiâm kal kí, Ngế pro  xiâm hnê ngăn Chin phuh hiăng pơkuâ hneăng hôp ƀă khu xiâm ngăn lêng ‘na tơdroăng pêi pro tiô pơkâ cheăng lêng hơnăm 2021; tơbleăng tơdroăng cheăng lêng ƀă tơdroăng cheăng pêi hơnăm 2022 ƀă pêi tơdroăng Pơkâ dêi khu xiâm kal kí ‘na tơkŭm cheăng Lêng Việt Nam pơla hơnăm 2021-2030 ƀă mâu hơnăm pơtối.

Tơbleăng hnê mơhno a hai pêi cheăng, pôa Phạm Minh Chính tối tiah kố, khu xiâm pơkuâ ngăn lêng pêi tro hnoăng cheăng hbrâ rôh pêi cheăng ƀă hên tơdroăng, mơnhên khât, tung mê veăng ai hnoăng dêi mâu kơ koan khu râ pơkuâ cheăng. Troăng rơhlâ mâu tơdroăng cheăng pêi ki kal hơnăm 2022, Ngế pro xiâm hnê ngăn tơnêi têa pơkâ thế Khu xiâm pơkuâ ngăn lêng pơtối mơdêk tơdroăng cheăng tí tăng ‘nâi plĕng, tối tơbleăng tro tơdroăng hbrâ tí tăng ‘nâi plĕng ƀă Đảng, tơnêi têa tơleăng mâu tơdroăng cheăng pôi tá kơdrâ; tơmâng khât tí tăng ‘nâi plĕng ƀă tơkŭm pêi tơ-ƀrê mâu troăng hơlâ tâi tâng, ki kal, ton ta ah, mơdât mâu tơdroăng tơ-klâ, tơdroăng ôh tá tơniăn ing hơngế.

Gương tơplôu ƀă tơbleăng