Kơxo hâi kơ 4/6, pôa Phạm Minh Chính Ngế pro xiâm hnê ngăn tơnêi têa pơkuâ hôp Chin phuh tiah hmâ khế 5/2025 a Tíu pêi cheăng Chin phuh. Tơbleăng mê ăm hlo cheăng kâ kân tơniăn, liăn ôh tá kơnâ yă châ mơdât, hên kơlo kơxô̆ tâk hên tâng vâ pơchông ƀă khế hdrối ƀă khế kô a hơnăm 2024.

Tối mơgêi rôh hôp, Ngế pro xiâm hnê ngăn tơnêi têa tối nhên: tơdroăng cheăng kâ - rêh ối pơlê pơla pơtối lĕm tro, khế kơ’nâi lĕm tro tâ khế hdrối, 5 khế apoăng hơnăm hôm tâ tâng vâ pơchông ƀă kéa kố dêi hơnăm nah. Ngế pro xiâm hnê ngăn tơnêi têa tơkŭm pêi pro 11 khu tơdroăng cheăng ki kal, tung mê ai tơdroăng mơdêk tah xơpá ‘na luât.

Luât cho pơxúa tơbriât kân, kal châ ‘mâi hơ’lêh rơdêi, ôh tá xê to xua ngế ki ê mê cho xua kuăn pơlê ƀă hdroâng mơngế. Ngế pro xiâm hnê ngăn tơnêi têa hnê mơhno pêi tơƀrê tơdroăng tơbleăng ‘’Khu pŭn to trăng xiâm” dêi Khu xiâm kal kí, hbrâ ví luât pro hnoăng mơhá dêi Mih, pơtối ‘mâi hơ’lêh luât, pơ’lêh kơxô̆ ƀă rah iâ mơngế pêi cheăng pro rế lĕm, pro xiâm mơnhông krá tơniăn ăm tơnêi têa.