Pôa Phạm Minh Chính, Ngế pro xiâm hnê ngăn tơnêi têa tối sôk ro ‘na tơdroăng mơnhông mơdêk ó rơdêi dêi UAE, tung mê ai Dubai. Ngế pro xiâm hnê ngăn tơnêi têa kheăn kơdeăn Tíu xiâm pơkuâ liăn ngân Dubai, môi tung mâu Tíu xiâm pơkuâ liăn ngân má môi lâp plâi tơnêi. Ngế pro xiâm hnê ngăn tơnêi têa pơkâ thế Tíu xiâm pơkuâ liăn ngân Dubai tơrŭm ƀă Việt Nam mơnhông mâu tơdroăng mơdró ‘na liăn ngân, tŏng kum mơnhông Tíu xiâm pơkuâ liăn ngân pơlê kong kân Hồ Chí Minh.

Pôa Arif Amiri tối ăm ‘nâi hbrâ tŏng kum tối túa ki rơkê mơjiâng tíu xiâm pơkuâ liăn ngân ƀă tơrŭm ƀă Việt Nam tung kơvâ mơdró liăn ngân. Kăn xiâm hnê ngăn pơkuâ Tíu xiâm Pơkuâ liăn ngân Dubai pói vâ rĕng lăm pôu Việt Nam, ki má lối cho Pơlê kong kân Hồ Chí Minh vâ pêi pro inhên mâu tơdroăng xiâm tơrŭm cheăng tiô mâu pơkâ dêi pôa Phạm Minh Chính, Ngế pro xiâm hnê ngăn tơnêi têa.