Tung tơdroăng tơrŭm nhŏng o, tơpui tơno ƀă tá hiâm mơno, péa Ngế pro xiâm hnê ngăn tơnêi têa kheăn kơdeăn mâu troăng mơnhông hluâ râ tung tơrŭm cheăng pơla Việt Nam ƀă Saudi Arabia tung 25 hơnăm hiăng hluâ ƀă môi tuăn tơrŭm cheăng krá tơniăn vâ djâ tơrŭm cheăng pơla péa tơnêi têa mơnhông mơdêk to a râ a’ngêi nếo.

Ing mê, péa ngế kăn pơkuâ môi tuăn mơdêk thăm tơpui tơno mâu khu râ kăn, ki rơhêng vâ tối cho khu râ kăn xiâm pơla péa pâ ƀă pakong mâu hôp tơpui tơno hên pâ; djâ tơrŭm cheăng kâ chiâng tơdroăng ki xiâm tung tơrŭm pơla péa pâ, djâ Saudi Arbia chiâng môi tung mâu khu mơ’no liăn cheăng má môi a Việt Nam ƀă tơmiât troh tơdroăng mơdêk pêi lo liăn tê mơdró pơla péa pâ tâk lối 10 rơtal dollars a hơnăm 2030.

Mơnhên tơdroăng ki xiâm tơrŭm cheăng dêi péa tơnêi têa cho pơhlêh nếo tơmiêt pêi rơkê, pơhlêh pêi cheăng krúa lĕm kong prâi, pơhlêh pêi cheăng xúa kŏng ngê̆; djâ hnê hriâm, ôm hyô, pêi cheăng trâm mâ tơpui tơno kuăn pơlê chiâng tơdroăng ki xiâm krá tơniăn ăm tơrŭm péa tơnêi têa.