Tung tơdroăng khên tơnôu rơtế lâp tơnêi têa leh tơbâ 80 hơnăm Kăch măng Khế Tơheăm ƀă Hâi mơjiâng tơnêi têa lơ 2/9, kơxo lơ 25/8, Khu xiâm mơjiâng ƀă pêi pro luât tơkŭm po Leh tơbâ 80 hơnăm Hâi mơjiâng kơvâ Mơjiâng ƀă pêi pro luât Việt Nam  (28/8) ƀă Hneăng hôp tơ’noăng pâ nhuô̆m tơnêi têa kơvâ Mơjiâng luât ƀă pêi pro luât roh má 6.

Mơnhên mâu tơdroăng châ tơƀrê dêi kơvâ Mơjiâng ƀă pêi pro luât tung 80 hơnăm hiăng hluâ, a roh leh, pôa Phạm Minh Chính, Ngế pro xiâm hnê ngăn Chin phuh teăng mâ khu râ kăn pơkuâ Đảng, Tơnêi têa diâp Mê dái pêi cheăng ối má môi ăm Khu xiâm hnê arak luât xua tơdroăng châ tơƀrê má môi tung kơvâ mơjiâng ƀă pêi pro luât, kum mơjiâng ƀă gâk kring Tơnêi têa Việt Nam xah hô̆i chuh ngiah, xua tơdroăng xiâm kuăn pơlê kro mơdrŏng, tơnêi têa ó rơdêi, kuăn pơlê pơkuâ dêi hnoăng cheăng, tơdâng tơ’mô, rơkê. 

Tung la ngiâ, pôa Phạm Minh Chính, Ngế pro xiâm hnê ngăn Chin phuh pơkâ thế kơvâ Mơjiâng luât ƀă pêi pro luât tơkŭm tah lôi pá puât, tơvâ tơvân ‘na pơkâ, luât, mơjiâng ki châ tơƀlê hluâ pơkâ ƀă mơhnhôk ƀă xúa châ tơƀrê tâi tâng rêm kơxô̆ liăn, mơjiâng tơdroăng ki tơ’lêi, ivá rơdêi ăm tơnêi têa krá tơniăn mot tung chal nếo. Ngế pro xiâm hnê ngăn tơnêi têa loi tơngah ƀă khôi túa lĕm tro vâi krâ nah 80 hơnăm kơvâ Mơjiâng ƀă pêi pro luât, tơdroăng pêi ‘na luât tung la ngiâ pơtối mơnhông nếo, kum pêi pro ƀlêi trâng tơdroăng cheăng kăch măng dêi Đảng, dêi hdroâng mơngế.