Xông tơpui djâ, Kăn xiâm chêh tôm xo rơkong UNCTAD pôa Rebeca Grynspan tối hâk tơngăm ‘na tơdroăng châ tơƀrê tơtêk dêi Việt Nam, châ 7% tung pơla 30 hơnăm hiăng hluâ. Kăn xiâm chêh tôm xo rơkong UNCTAD mơnhên tơdroăng Hneăng hôp UNCTAD 16 châ tơkŭm po a môi kong têa mơnhông ƀeăn ƀĕng rơkê kơnôm lôu péa, mot tơrŭm châ tơƀrê môi tiah Việt Nam mơnhên troăng mơnhông ai kơnâ tung hneăng nếo dêi UNCTAD.

A hôp tơpui tơno, pôa Phạm Minh Chính, Ngế pro xiâm hnê ngăn tơnêi têa mơnhên mâu pơloăng mơnúa nôkố ƀă tê mơdró ƀă mơnhông tơkŭm po tung lâp plâi tơnêi, tơdjâk tâi tâng troh tâi tâng rêm ngế xua mê kal troăng châ achê tâi tâng kuăn pơlê, tâi tâng ƀă lâp plâi tơnêi xua mê mâu kong têa kal thăm tơrŭm cheăng, tơdjuôm ivá, hbrâ mơdât chuh ngiah tŏng gum ƀă mơdêk tê mơdró hên pâ ăm mơnhông mơdêk.

Ki rơhêng vâ tối vâ trâm ƀă pơloăng mơnúa mê tung chal rơkê, Ngế pro xiâm hnê ngăn Chin phuh tối thế ‘nâi ‘’chal rơkê’’ môi troăng tâi tâng. Tối nhên hiâm mơno Việt Nam ‘’hiăng tối cho pêi, hiăng tơkêa cho pêi pro’’, pôa Phạm Minh Chính, Ngế pro xiâm hnê ngăn tơnêi têa mơnhên Việt Nam nhuô̆m tơdroăng tơkŭm po Hneăng hôp UNCTAD 16 vâ koh tơdah kăn teăng mâ ing lâp pơtăm châu.