Kơxê lơ 13/4, pôa Phạm Minh Chính, Ngế pro xiâm hnê ngăn tơnêi têa tơdah pôa Park Hark Kyu, Kăn xiâm pơkuâ liăn ngân dêi Grup pơkuâ Samsung. A rôh tơdah, Ngế pro xiâm hnê ngăn tơnêi têa tơngah ƀă rơhêng vâ, tung tơdroăng ki kal tơniăn lĕm pơla péa tơnêi têa, mâu tơdroăng ki tơƀrê tung tơrŭm cheăng ki hiăng châ rơhéa ƀă tơdroăng ki tơngah, tơdrăng, Samsung kô pơtối cho môi tung mâu hlá cơ ki apoăng mơdêk tơrŭm cheăng kâ pơla péa tơnêi têa ƀă tơ’nôm hên tơdroăng tơkêa nếo ai ivá tơƀrê tung la ngiâ, pơtối mơdêk tơdroăng ki pêi cheăng tê mơdró ƀă po rơdâ ‘no liăn cheăng, tơmiât troh mâu tơdroăng pơkâ nếo hên tâ tung hơnăm 2023 ƀă mâu hơnăm ki pơtối.

Ngế pro xiâm hnê ngăn Chin phuh Việt nam tơhrâ kô pơtối rơtế prôk, tơmâng, tơpui tơno, teăm tŏng kum tơdrêng mâu tơdroăng ki xơpá, tơvâ tơvân, ai mâu troăng hơlâ pơkâ tơtro ƀă tơdroăng dế trâm, pro tơ’lêi hlâu ăm mâu khu ki ‘no liăn cheăng kong têa ê, tung mê ai Samsung ‘no liăn cheăng mơdró tơƀrê ƀă mơnhông krá rơdêi a Việt Nam ƀă túa tơmiât “pơxúa tơrŭm, ôh tá mơhúa kô veăng kum dêi rơpó”.