A rôh trâm mâ, tung tơdroăng ki hâk mơnâ, loi tơngah, pơxúa ƀă hơniâp ro, péa Ngế pro xiâm hnê ngăn tơnêi têa tối nhên péa pâ kô pơtối pêi pro hơ’lêh ƀă ăm tơdroăng ki tối tơbleăng tơdjuôm Việt Nam – Sinuâ vêh pơtối mơdêk rơdêi ƀă trâu hơngế tâ tơrŭm cheăng tung la ngiâ tâi tâng pơla Việt Nam – Sinuâ.

Pêi pro tơƀrê tung rôh lăm Sinuâ pơla hdrối nah dêi pôa Nguyễn Phú Trọng, Kăn xiâm pơkuâ ngăn Đảng chiâng mâu tơdroăng pêi pro ki nhên; môi tuăn mơdêk trâm mâ pơkâ mơdêk ƀă rêm râ, mơdêk tơrŭm tơƀrê, ai pơxúa, rơtế ai pơxúa tung mâu kơvâ cheăng, pro pơxua kal ăm kuăn pơlê péa tơnêi têa.

Pôa Phạm Minh Chính, Ngế pro xiâm hnê ngăn tơnêi têa pơkâ thế mơdêk tê mơdró tơdâng tơ’mô, malối cho rak vế tê mơdró tơniăn a mâu bo cheăng, pro tơ’lêi hlâu ăm kế tơmeăm Việt Nam châ tê ngi kong têa Sinuâ, malối cho tung rôh Têt Nguyên đán dế vâ chê troh vâ kuăn pơlê péa pâ kâ Têt phâi tơtô, hơniâp ro.