Kơxê lơ 10/11, a kong têa Kul, pôa Phạm Minh Chính, Ngế pro xuâm hnê ngăn tơnêi têa hiăng trâm pôa Ferdinand Romualdez Marcos, kăn xiâm pơkuâ kong têa Philippines. A rôh trâm, péa ngế kăn xiâm pơkuâ tối hơniâp ro châ hlo tơrŭm cheăng tung la ngiâ Việt Nam – Philippines mơnhông tơniăn lĕm maluâ trâm hên xơpá xua pơreăng kân COVID-19; malối cho mơnhên tối tơdroăng ki péa pâ rak vế tơƀrê mâu tơdroăng cheăng trâm mâ, pơtroh mâu khu râ kăn xiâm.

Tơpui tơno tê mơdró pơla péa pâ mơnhông rơdêi, tâi tâng kơxô̆ liăn châ xo ing tê tơmeăm ngi kong têa ê hơnăm 2021 châ 6,8 rơtal dollars, hên má môi sap nah troh nôkố; tung 8 khế apoăng hơnăm kố, kơxô̆ ki kố châ vâ chê 5,4 rơtal dollars. Pôa Phạm Minh Chính, Ngế pro xiâm hnê ngăn tơnêi têa pơkâ thế péa pâ tơrŭm hbrâ tro má môi ăm rôh lăm pôu Philippines la ngiâ dêi pôa Vương Đình Huệ, kăn xiâm hnê ngăn Kuô̆k hô̆i.

Pôa Phạm Minh Chính, Ngế pro xiâm hnê ngăn tơnêi têa pơkâ thế péa tơnêi têa mơdêk tê mơdró, tung mê ai tê mơdró phái; séa ngăn tơdroăng ki tah lôi mâu tơdroăng ki pro pá, pro tơ’lêi hlâu tung tê mơdró ƀă ‘’no liăn cheăng ăm khu mơdró kâ dêi rơpó, mơdêk tê mơdró kế tơmeăm pêi lo ing chiâk deăng, malối cho mâu kế tơmeăm ki ai yă kơnâ. Ngế pro xiâm hnê ngăn tơnêi têa pâ thế Philippines pơtối tơmâng ngăn, pro tơ’lêi hlâu ăm kuăn pơlê Việt Nam pêi cheăng kâ, rêh ối a Philippines.