Kơxo hâi lơ 18/4, a Hà Nội, khu rah chêh hlá tơbeăng Kŏng sản tơkŭm po hneăng Hôp tơbleăng Pơkâ dêi Kăn hnê ngăn ‘na tơdroăng cheăng kăn ƀô̆. Ing mê, Kăn hnê ngăn pơkâ ăm pôa Phạm Minh Tuấn pơtê pro Ngế pơkuâ -  ngế xiâm rah chêh hngêi chêh in hlá mơ-éa Kal kí dêi tơnêi têa ki khât; rah pôk pôa Phạm Minh Tuấn pro Ngế phŏ pơkuâ rah chêh Hlá tơbeăng Kŏng sản.

Diâp hlá mơ-éa pơkâ dêi Kăn hnê ngăn ăm pôa Phạm Minh Tuấn, Phŏ pơkuâ khu tơrŭm cheăng xiâm - pôa Mai Văn Chính ăm ‘nâi, Khu kăn hnê ngăn hiăng pơkâ xoăng hnoăng cheăng pêi ăm pôa Phạm Minh Tuấn, mê cho tơdroăng cheăng ki nếo a môi kơ koan tơpui kâ tơdroăng kal kí dêi Khu kăn xiâm tơnêi têa, tíu mơhno troăng rơhlâ ‘na tơpui kâ dêi Đảng, kal thế pôa Phạm Minh Tuấn mơ-eăm khât, mơ-eăm tâi ivá tơná vâ pêi klêi hnoăng cheăng tiô pơkâ.