Tung kơxo lơ 8/11, a Cung Hòa Bình a pơlê kong xiâm Phnôm Penh, pôa Samdech Techo Hun Sen, Ngế pro xiâm hnê ngăn Chin phuh Kul pơkuâ leh tơdah pôa Phạm Minh Chính, Ngế pro xiâm hnê ngăn Chin phuh ƀă khu kăn xiâm Việt Nam lăm pôu kong têa Kul. Klêi leh tơdah, péa ngế pro xiâm hnê ngăn tơnêi têa hôp tơpui tơno.

Hdrối mê, klêi troh a kong têa Kul, pôa Phạm Minh Chính hiăng ‘măn hơvĭng reăng a Đài Độc lập, Um meăn pơtáu Norodom Sihanouk, Tíu tơrŭm cheăng pơla Việt Nam - Kul a pơlê kong xiâm Phnom Penh. Tung tơdroăng lăm pôu khât kong têa Kul, klêi pôa Phạm Minh Chính hôp tơpui tơno ƀă Ngế pro xiâm hnê ngăn kong têa Kul; Ngế pro xiâm hnê ngăn tơnêi têa pin koh pơ’lâng pơtáu Norodom Sihamoni; hôp tơpui tơno ƀă pôa Say Chhum, Kăn xiâm Kuô̆k hô̆i râ má môi kong têa Kul; hôp tơpui tơno ƀă pôa Heng Samrin Kăn xiâm hnê ngăn Kuô̆k hô̆i Kul. Hneăng lăm pôu “hơnăm tơrŭm cheăng pơla Việt Nam Kul 2022’’ veăng mơnhông mơdêk tơrŭm ƀă kong têa ki achê tơniăn lěm tơrŭm tơrôa tung tŭm tơdroăng cheăng, krá ton pơla péa tơnêi têa.