A rôh tơdah, pôa Tô Lâm, Kăn xiâm pơkuâ cheăng Đảng tối nhên, tơdroăng Pơhlăng cho kong têa tung EU ki apoăng chiâng kong têa tơrŭm cheăng dêi Việt Nam cho ăm hlo lĕm tro hlo Việt Nam ngăn nhoăm ƀă púi vâ trâu rơdâ tâ nếo tơrŭm cheăng, tơrŭm tung tŭm tơdroăng ƀă Pơhlăng; pơkâ thế Pơhlăng, ƀă hnoăng cheăng cho tung khu ki xiâm ƀă ai rơkong tơpui tung EU, mơdêk tâ nếo tơrŭm pơla Việt Nam - EU vâ veăng ‘no hnoăng hơniâp lĕm, tơniăn ƀă mơnhông dêi kơpong ƀă lâp plâi tơnêi.

Pôa Tô Lâm, Kăn xiâm pơkuâ hnê Đảng ƀă Kăn teăng mâ Pơhlăng vâ môi tuăn pơtối mơdêk tơrŭm cheăng tung hên tơdroăng cheăng ƀă khu tơrŭm lâp plâi tơnêi, mơnhông chuh ngiah hên troăng, nhoăm luât lâp plâi tơnêi; tơleăng mâu tơdroăng pơloăng mơnúa tung lâp plâi tơnêi. ‘Na tơdroăng Biển Đông, Kăn teăng mâ Pơhlăng tối nhên Pơhlăng ƀă EU môi tuăn ƀă troăng hơlâ Việt Nam ƀă ASEAN ‘na tơleăng mâu tơdroăng tơbriât dêi rơpó ƀă mâu troăng hơlâ hơniâp lĕm ing tơdroăng pêi pro tro luât lâp plâi tơnêi, veăng pơtối rak ki hơniâp lĕm, kring gak tơniăn, pro tơniăn ‘na troăng tơƀai ƀă a troăng têa kơxĭ a tung kơpong.