Tiô mơ-éa chêh pêi pro pơlê kong kân pơkâ, rơnó IV tung hơnăm kal tâk lối 13% vâ pêi pro pơkâ tơtêk hơnăm 2026. Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối kố cho pơkâ ki kơtăng, pơkâ thế mơnhên inhên ivá tơveăng dêi rêm kơvâ, rêm tơdroăng tơkêa bro ƀă rêm khu tê mơdró.

Tung pơla lâp plâi tơnêi dế ôh tá tơniăn rĕng, pơlê kong kân thế mơdêk ivá tối hdrối, hbrâ mơjiâng tơdroăng hbrâ mơdât, laga ƀă tơdroăng krá chân mâu pơkâ ton xŏn ‘na pêi lo châ hên, kŏng ngê̆, mơngế pêi cheăng ƀă tíu rêh ối. Pôa pơkâ thế Khu pơkuâ tơdroăng cheăng Đảng pơlê kong kân pơtối pơhlêh nếo troăng tơmiât pơkuâ xêh, mơdêk ivá pơkuâ pêi pro, tơpui ƀă pêi pro tơdroăng cheăng troh tơdroăng châ tơƀrê má mơ’nui.

Xúa châ tơƀrê hnoăng pơkuâ ing Luât Mơnhông tíu pơlê kân vâ kơdroh pro mơ-éa, kơdroh kơlo liăn mơ’no ăm kuăn pơlê ƀă khu tê mơdró. Séa ngăn tâi tâng hnoăng cheăng hrá pêi pro, pêi pro pôu râng hnoăng cheăng, mơnhên inhên hâi khế tơpui ƀă pêi pro, tíu ki kreăng dêi rêm hô sơ. Pêi pro krá khu pêi cheăng tơnêi têa khu râ kăn pơkuâ péa râ, kơjo kơxô̆ liăn ăm pơlê pơla, bêng pá hên tơdroăng; pêi pro xúa ‘noăng chư chêh vâ kơdroh pá ăm kuăn pơlê, khu tê mơdró. Mơnhên kăn ƀô̆ ƀă tơmeăm ki ai khât ƀă tơdroăng môi tuăn dêi pơlê pơla, pơhlêh ngế ki ê tơdrêng kăn ƀô̆ ôh tá tơxâng pơkâ.