A rôh trâm mâ, Kăn xiâm pơkuâ hnê ngăn Đảng, Kăn xiâm hnê ngăn tơnêi têa khĕn kơdeăn mâu hnoăng veăng 'no dêi mâu rơxông mâu kăn kơdrâi cheăng tung Kuô̆k hô̆i, tơdrêng amê hlối tối rơdêi pơkâ mơnhông tuăn ngôa rơkê, khên tơnôu ƀă hnoăng cheăng dêi vâi kơdrâi tung tơdroăng cheăng mơjiâng luât, séa ngăn ƀă pơkâ mâu tơdroăng ki kal dêi tơnêi têa. Kuô̆k hô̆i hneăng má XVI ai 150 ngế kăn kơdrâi, châ 30% tung tâi tâng kơxô̆ mâu kăn.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơhêng vâ mâu kăn kơdrâi hbrâ rơnáu veăng sap ing hdrối tung tơdroăng hriăn plĕng, mơjiâng troăng hơlâ; mơnhên xiâm kối tơdroăng ki ai khât, ki tơdâng tơ'mô ƀă ki chiâng pêi pro dêi mâu tơdroăng pơkâ luât. Tơdrêng amê, kal rak vế troăng tơmiât, hbrâ rơnáu pơkâ mơ'no troăng hơlâ xua ki pơxúa tơdjuôm, mơdât ki pơxúa krê, ki pơxúa khu tơdjâk troh troăng hơlâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa xuân pơkâ thế mâu kăn kơdrâi achê pơlê cheăm, tơmâng rơkong tơpui tối, tơdroăng púi vâ dêi kuăn pơlê; tơmâng troh tá tui lui mâu rơkong pâ thế dêi kuăn pơlê. Malối, kal kơhnâ veăng pơkâ mâu troăng hơlâ mơnhông cheăng kâ - rêh ối, liăn ngân hơnăm 2027, rak tơniăn hnoăng ƀă ki pơxúa tơxâng dêi vâi kơdrâi ƀă kuăn pơlê, veăng kum pêi pro mâu pơkâ mơnhông tơnêi têa troh hơnăm 2030, tơmiât mâu tơdroăng vâ pêi pro troh hơnăm 2045.