Roh lăm pôu pêi cheăng râ Tơnêi têa troh Hàn Quốc dêi pôa Tô Lâm, Kăn xiâm pơkuâ hnê ngăn Đảng roh kố kô kum pro krá tơniăn tá hiâm mơno loi kal kí pơla péa tơnêi têa, tơdrêng amê, mơnhên môi tơdroăng ki kal, po troăng hơlâ nếo ăm tơrŭm cheăng Hàn Quốc – Việt Nam.

Tung roh lăm pôu pêi cheăng râ Tơnêi têa troh a Hàn Quốc, kơxê ki mê, pôa Tô Lâm, Kăn xiâm pơkuâ hnê ngăn Đảng hiăng tơdah pôa Ahn Gyun Back, Kăn xiâm hnê ngăn Khu râ kăn Kuô̆k hô̆i râ má môi nhŏng o Hàn Quốc – Việt Nam. Pôa Tô Lâm, Kăn xiâm pơkuâ hnê ngăn Đảng pơkâ thế péa Khu kăn Kuô̆k hô̆i râ má môi nhŏng o thăm tơrŭm, mơnhông hnoăng kông tơdjêp tiô hiâm mơno Môi tuăn tơrŭm cheăng pơla péa Kuô̆k hô̆i, kum séa ngăn, mơhnhôk, pro tơ’lêi hlâu ‘na luât ăm tơdroăng pêi pro mâu tơdroăng môi tuăn, tơdroăng pơkâ hiăng kĭ pơla péa tơnêi têa, mơdêk tơrŭm cheăng Việt Nam – Hàn Quốc rế hía rế mot trâu hơngế, châ tơƀrê ƀă krá tơniăn; tơdrêng amê thăm tơrŭm, tŏng gum dêi pó tung mâu roh hôp tơpui tơno kơpong ƀă lâp plâi tơnêi.