Mơgêi roh pêi cheăng, Kăn xiâm pơkuâ hnê ngăn Đảng pơkâ thế Đảng ủi Chin phuh tơrŭm mâu kơ koan thâ mơnhên tơdroăng cha tơƀrê pêi pro Tơdroăng pơkâ kơxô̆ 19 ‘na pêi chiâk deăng, kuăn pơlê pêi chiâk deăng, thôn pơlê ƀă Tơdroăng pơkâ kơxô̆ 06 ‘na pơkâ pêi, mơjiâng, pơkuâ tíu kơdrâm kuăn pơlê rêh ối tê mơdró.

Kăn xiâm pơkuâ hnê ngăn Đảng pơkâ mâu tơdroăng mơnhên thế ôh tá tơdjâk pakong, tâi tâng, tối nhên mâu tơdroăng kal pơhlêh; tơdrêng amê hriăn plĕng inhên mâu pơloăng mơnúa nếo klêi kơ’nâi rah xo bro lế lĕm tro tíu pêi cheăng tơnêi têa, troăng pêi khu râ kăn pơkuâ péa râ.

Pakĭng mê, kal séa ngăn troăng mơnhông tíu kơdrâm kuăn pơlê rêh ối tê mơdró, thôn pơlê tiô rơxông nếo tung lâp plâi tơnêi vâ tơ’nôm, ‘mâi rơnêu, tơniăn mâu pơkâ tơtro ƀă nôkố, tơxâng pơkâ mơnhông tơnêi têa tung hneăng nếo.