Hâi lơ 25/8/2025, a tíu pêi cheăng xiâm Đảng, pôa Tô Lâm rơtế ƀă hên ngế Khu xiâm kal kí pêi cheăng ƀă Khu pơkuâ cheăng Đảng Lêng Xiâm, ăm veăng tối a hlá mơ-éa chêh ƀă troăng hơlâ ‘na mơngế ki pêi cheăng pơtroh ăm Hneăng hôp Đảng ƀô̆ mâu lêng rôh má 12, hneăng hơnăm 2025-2030. Klêi tơmâng tối tơbleăng, Khu xiâm kal kí tơmâng ƀă khĕn kơdeăn khât hbrâ kơhnâ, rơnáu  dêi Đảng  Lêng xiâm Tơnêi têa, mâu kơ koan khu râ pơkuâ cheăng ƀă râ ủy, khu tơrŭm cheăng Đảng rêm râ tung Đảng ƀô̆ Lêng.

Hneăng hôp rêm râ tung tâi tâng mâu lêng hiăng châ tơkŭm po tro, vêh hriâm mâu tơdroăng ki hno hnê mơhno, châ tơƀrê; kăn ƀô̆ pơkuâ ƀă mâu kăn tro rah xo ƀă kơxô̆ phĭu rah xo hên. Đảng lêng xiâm xuân hiăng hbrâ nhên ‘na hlá mơ-éa chêh, ‘na mơngế, tơniăn tro tiô tơdroăng Hnê mơhno dêi Khu xiâm kal kí ƀă hnê mơhno dêi Tíu xiâm. Khu xiâm kal kí tối nhên tơdroăng kal vâ pêi tro khât mâu troăng hơlâ ki kân, tơniăn pê klêi hneăng hôp Kân Đảng ƀô̆ Lêng rôh má 12.