Ing tơdroăng séa ngăn mâu tơbleăng, mơ-éa tơbleăng ƀă rơkong tơpui dêi mâu ngế pêi cheăng Tiêuh ƀan Mơngế pêi cheăng, pôa Tô Lâm, Kăn xiâm pơkuâ hnê ngăn Đảng tối nhên, Hneăng hôp má XIV ai kơnâ kal khât djâ troăng ki châ tơƀrê, po môi chal nếo, ‘’chal xông mơ-eăm mơnhông mơdêk kro mơdrŏng rơdêi, tơtêk dêi hdroâng mơngế’’.

Mơnhên tối tơdroăng, Kăn xiâm pơkuâ hnê ngăn Đảng pơkâ kân tung tơdroăng hbrâ ƀă mơdêk ki dâi lĕm mâu mơ-éa ki kal Hneăng hôp má XIV dêi Đảng, tung mê ai troăng tơdroăng mơngế pêi cheăng. Kăn xiâm pơkuâ hnê ngăn tối rơdêi, pơkâ pêi plâh má mơ’nui cho thế mơjiâng khŏm châ khu pú hên Khu xiâm pơkuâ cheăng Đảng, Khu xiâm kal kí, Khu pơkuâ hnê ngăn cheăng Đảng, ki má lối cho mâu khu kăn pơkuâ ki xiâm păng ‘nâng cho ai hiêm mơno lĕm, ivá pơkuâ, kuăn pơlê loi tơngah; tơdroăng tơrŭm môi tuăn tuăn, môi tuăn tơnêi têa, tơdjuôm ivá, môi hiêm mơno, khŏm mơ-eăm pơhlêh nếo rơkê ƀă pêi pro lĕm tro tơdroăng cheăng, hnoăng pơkuâ dêi Đảng ƀă tơnêi têa tung rơxông nếo; kum djâ hơtô, hơniêp lĕm ăm Kuăn pơlê.