Kăn xiâm pơkuâ hnê ngăn Đảng tối, tung plâ mâu hơnăm pêi cheăng ăm kăch măng, Đảng, Tơnêi têa pin đi đo tối hnê hriâm ƀă hnê mơjiâng tuăn ngôa rơkê cho luât pơkâ ki má môi, cho tung la ngiâ dêi hdroâng mơngế. Nôkố, tung tơdroăng pơ’lêh nếo tơnêi têa, pơ’lêh nếo hnê hriâm xuân châ Đảng tơkŭm mâu kăn, hnê mơhno ƀă pêi châ hên tơdroăng tơƀrê.

Kăn xiâm pơkuâ hnê ngăn Đảng pơkâ thế, kal tơbleăng hlối troăng hơlâ xut tah ki ôh tá ‘nâi chư, malối a kơpong hngế hơngo, tung kuăn pơlê hdroâng kuăn ngo; pơtối tơkŭm séa ngăn, tơleăng mơnhên klêi mâu tơdroăng ki ôh tá bê hngêi trung, ôh tá bê lâm hriâm a mâu pơlê kong kân, kơpong hngêi kơmăi, ‘mâi rơnêu hngêi trung, lâm hriâm, rơtế ƀă pro tơniăn tíu ối ăm mâu thái cô kơpong hơngế hơngo, kơpong hdroâng kuăn ngo; tơniăn ‘na liăn ngân tơnêi têa hrê ăm ‘na hnê hriâm ki iâ ai 20% tung tâi tâng kơxô̆ liăn hrê ăm hngêi rak liăn tơnêi têa tiô tơdroăng pơkâ ki Đảng hiăng pơcháu.