A rôh pêi cheăng, ing tíu mơ’no Hà Nội pôa Tô Lâm, Kăn xiâm pơkuâ hnê ngăn cheăng Đảng hiăng pôu kơ-êng, tơpui mơhnhôk kăn ƀô̆ lêng Mố đô̆i gâk tơkăng kong, teăng mâ kăn ƀô̆, kuăn pơlê ƀă khu lêng kring vế tơniăn a mâu tíu mơ’no tơdjêp đông mố đô̆i gâk tơkăng kong a mâu kong pơlê.

Tối nhên, hơnăm 2025, môi hơnăm ki ai hên tơdroăng tơkŭm po kân krip, mâu tơdroăng cheăng kal pêi pro tơdrêng ki pin athế pêi klêi vâ pro ivá ăm hneăng “mơ-eăm” dêi hdroâng mơngế, xua mê khu lêng Mố đô̆i gâk tơkăng kong xuân kal mơnhông vâ châ pêi klêi mâu tơdroăng pơkâ pêi, túa pơkâ pêi dêi hơnăm pêi cheăng 2025.

Drêng rôh têt troh rơnó Hơngui vêh, Kăn xiâm pơkuâ hnê ngăn cheăng Đảng pơkâ thế, tơbleăng pêi pro kơtăng tơdroăng pơkâ dêi Khu pơkuâ ngăn Đảng, dêi Ngế pro xiâm hnê ngăn Chin phuh ƀă mâu tơdroăng pơkâ thế dêi Khu xiâm pơkuâ ngăn lêng; tơkŭm lăm pơtrui ngăn, séa ngăn, hbrâ mơdât kơtăng troăng tơkăng kong, bo cheăng, rak vế gâk kring tơniăn tơdroăng kal kí, tơniăn tung pơlê pơla kơpong tơkăng kong, bo cheăng tung rôh Têt; rak vế tŭm tơdroăng pơkâ pêi, troăng hơlâ tŏng gum Têt, tơkŭm ăm mố đô̆i tơdah rơnó Hơngui, kâ Têt hơniâp ro, hơtôu, tơniăn, kơdĭng; tơmâng ngăn, tŏng gum ăm mâu ngế ki châ tơnêi têa tŏng gum, rơpŏng kơtiê a tơring cheăm tơkăng kong, chuăn rơlố, têa kơxĭ.