Kăn xiâm pơkuâ hnê ngăn Đảng khĕn kơdeăn mâu hnoăng veăng 'no dêi Kăn teăng mâ tung tơdroăng mơdêk tơrŭm cheăng pơla Việt Nam - Philippines; hlối tối rơdêi hơnăm 2025 cho hdró tơbâ 10 hơnăm mơjiâng  tơrŭm cheăng pơla péa tơnêi têa. Kăn xiâm pơkuâ hnê ngăn Đảng pơkâ thế péa pâ pơtối mơdêk tơrŭm cheăng kal kí - tơpui tơno, mơdêk tơpui tơrá mâu kăn, mơ-eăm djâ tê mơdró pơla péa pâ rĕng châ 10 rơtal dollars.

Pakĭng mê, péa pâ kal po rơdâ tơrŭm cheăng tung mâu kơvâ kring tơniăn - cheăng lêng, túa lĕm tro, hnê hriâm hbrâ ví hyôh kong prâi hơ’lêh. Pôa Tô Lâm tối, Việt Nam kô veăng ƀă Philippines xo pêi hnoăng cheăng tơƀrê hnoăng cheăng Kăn xiâm ASEAN hơnăm 2026, hlối tơrŭm krá ƀă mâu kong têa tung ASEAN ki ê, vâ pơtối rak hnoăng cheăng ki xiâm dêi khu, mơjiâng môi kuăn pơlê ASEAN tơrŭm dêi rơpó, ing ivá mơ-eăm dêi ƀă mơnhông krá tơniăn.