Kăn xiâm hnê ngăn péa pâ tối phiu ro hlo mâu tơdroăng cheăng mơnhông tơƀrê pơla péa Đảng, péa tơnêi klêi mơdâk tơrŭm cheăng to a mâu kuăn pơlê kong têa tối ăm ‘nâi tung la ngiâ ai pơxuá kân; tơrŭm tơrôa cheăng lêng châ péa pâ tơmâng khât mơdêk rơdêi, rế ai pơxúa, tơƀrê.

Pôa Tô Lâm, Kăn xiâm pơkuâ hnê ngăn Đảng tối, Đảng, Tơnêi têa, mâu lêng ƀă kuăn pơlê Việt Nam đi đo nhoăm ƀă chôu pâ tơdroăng veăng gum kân kĭn dêi Đảng, Tơnêi têa, mâu lêng ƀă kuăn pơlê Sinuâ nuâ tung tơdroăng cheăng kăch măng, tơplâ châ tơleăng lĕm tơnêi têa ƀă tơleăng lĕm hdroâng mơngế hdrối nah xuân môi tiah tung mơjiâng chuh ngiah pơlê pơla nôkố.

Pôa Tô Lâm pơkâ thế mâu lêng péa tơnêi têa mơdêk tơrŭm  cheăng, tơrŭm séa ngăn ƀă tơleăng mơnhên tro tâ mâu tơdroăng ki ôh tá môi tuăn dêi rơpó, pơtối rak hơniâp lĕm, tơniăn a têa kơxĭ, tơleăng mơnhên ki ôh tá môi tuăn ƀă mâu tơdroăng hơniâp lĕm tơniăn, tơtro ƀă ki hlê plĕng tơdjuôm ƀă luât lâp plâi tơnêi.